ХIажиева Изольда Исрапиллул душ.
Бувну бур КIулушацIрал шяраву. Бухгалтернал кIулшиву ларсун, зий бивкIун бур Дагконсервпромрай, яла Гъумук РАЙПО-рай, ПаччахIлугърал санэпиднадзорданий. Юристнал кIулшиву ларсун, 2001 шиная шинмай зий бур Лакрал райондалул ЗАГС-рал идаралул каялувчину.

---

Декабрь зурул 18-нний жула билаятрай кIицI лагайссар ЗАГС-рал зузалтрал кьини. Му байрандалун гьашину там хъанай дур 100 шин. 2001 шиная шинмай Лакрал райондалул ЗАГС-рал идаралул каялувчину зий бур Исрапиллул душ ХIажиева Изольда.

— Изольдай, ЗАГС тIи­сса махъ баявривун, хIа­сул шай ташулийн ва хъатIуйн багьайсса асарду. Му тIурча, бур хъинну агьамсса паччахIлугърал идара, инсан дунияллийн уккаврия байбивхьуну, га ахиратрал шаврил чичру сияхIрайн ласласисса. Буси, ялагу ци буржру биттур буллали­ссар мунил?
— Ва даврийн зун бучIаннин ттун ттунмагу мукун ххай би­кIайва. Иширайн бувну тIурча, цума-цагу инсаннал щала оьрму бавхIуну бур ва идаралуцIун. Дунияллийн увккун, дунияллия гьанцIа, инсан битлай ур личIи-личIисса шачIантту, кулпат баврия байбивхьуну, оьрчIру баврийн, ми хъуни бувну, тарбия бувну, ташулул бувну, оьрчIал оьрчIру хъуни буллалаврийн бияннин. Ми мурадру чулийн бу­ккан баншиврул инсан чIумуя-чIумуйн укIлай ур ЗАГС-райн. Ттулмур лабизаву так ххарисса иширттай бакъа къабагьаннав инсаннан жул идаралул бухкIулу лахъан тIиссар.
ЗАГС-рал даврил буржру хъанахъиссар вай мурадру сияхIрайн ласаву: инсан дунияллийн укка­ву, магьар бишаву, буттал цIа дулаву, оьрчI-душ цалашиврий бишаву, фамилия ягу цIа даххана даву, магьар лиххан баву, ивчIаврил чагъар булаву. ГъалатI итххявхсса, зия хьусса ягу бакъа хьусса документирттан кIанттай цIунил булайссар, так цащала инсантурацIун бакъа, цаймигу властьрал органнацIун (МВД-лул, прокуратуралул, суд­рал ва силистталул, аьрали комиссариатрал) бавкьуну.

— ХьхьичIава чIаххувсса шяраваллал дянивсса ташурдугума хъинну нажагьсса бивкIхьурча, махъппурттуву Дагъус­ттаннай гьарза хъанай бур миллатирттал дянив­сса ташурду. Лакрал райондалий ци тагьар дур?
— Миллатирттал дянивсса ташурду шиная шинайн чIяву хъанай бур. Муниву ттун оькки­шиву чIалай дакъар, бавкьусса, нахIу-хIалимсса кулпатру лагма-ялтту чIявусса бушиврийн бувну.Так ца диялдакъашиву личIаннин – ниттил мазрацIа хьун бюхъаву.

— БучIиссарив ЗАГС-рал зузалайн ташулул шадлугърайн ресторандалувун ягу цамур кIанттай магьар бишин оьвчин?
— Закондалий магьар бишин ккаккан бувну бур ЗАГС-рал къатраву. Амма ттигъанну на буккав, махъсса чIумал ташу буллалими ЗАГС-рал органнайн тарихийсса ва магьирлугърал агьамшиву ду­са кIанттурдай магьар бишин ччи­сса оьвчавурттащал буклай бушиврийн бувну, ПаччахIлугърал Думалул депутатътурал хьхьичI бишин тIий бусса бур мукунсса кIанттурдай магьар бишин ихтияр дулун ккаккан дуллалисса проект. Амма ттун кIулссаксса, ва суал бувар ттигу ххал бигьин.

— Ттизаманнул жагьилтуран ччай бур щихачIав къалавхьхьуну, ляличIину дуван ташулул шадлугъ. Ци журалий шай магьар бишаврил шадлугъ?
— Магьар бишаврил журарду чIявур, ташулул хъанахъими цивппа бувкIун, сияхIрал луттирай къулбасругу дурну, магьарданул чагъаргу лавсун лагай. Мунигума на хIарачат бара му лахIза миннан абадлий дакIний личIансса куццуй гьан бан. Миннал рязисса симаннах бурувгун, ттуща му къаоьккину шайнуккар. Бишару магьар цин лав­хьхьуну чIюлу бувсса кIанттурдай: хьхьирил зуманицI, паркраву, хъатIуйва ресторандалуву. Ттизаманнул жагьилтуран асарду, гьавас ччай бур. Ми цала вариантру буслан бикIай. Муния хъинну ххари шара, цанчирча минная ттунмагу лахьлай бур. Нагу, миннащал ххаришиву кIидачIлай, дакIнихтуну талихI чIа учара.

— Махъзуманий жула жагьилтал диндалухун багьлай, граждан магьардануяр бусурман магьар агьамну ккаклай бур. БучIиссарив мукун? Жула райондалий муних цукун буруглай бур?
— Жагьилтал диндалухун багьлай бушивруву ттун цичIав оькки­шиву чIалай дакъар. Так гьарзадрал дикIан аьркинссар дя-зума. Бусурман магьар граждан магьарданущалгу бишин бюхъай­ссар. Жува дуниявий­сса сса кьануннайн мютIину ялапар хъанай бушиву хIисавравун лавсун, жула халкьуннал граждан магьар бишаврих баччибакъулшиву къадай.

— Цими оьрчI-душ буври райондалий яла лаглаги­сса шинал? Цуми дур яла сийлийсса цIарду?
— Уттинин райондалий бувунни 120 оьрчI: 50 оьрчI, 70 душ. Ларгсса шиналнияр 25 оьрчI ххисса. Амма, цайми районнах бурувгун тIурча, лап чансса хъанай бур, яхIгума гъагъай. На дахьва зун бувкIсса 2001 шинал июнь зурул 16-нния 2017 шинал декабрь зурул 15-ннийнин райондалий бувну бур 2251 оьрчI, миннава – 1105 оьрчI, 1146 душ. (Табасараннал райондалий вайксса оьрчIру бай­ссар кIира шинай. З. Т.).
ОьрчIал цIардаву яла ишла­сса дур МахIаммад, Рамазан, Ислам. Душваран чIяруну дизай ПатIима (ягу Фатима), Аминат (ягу Амина), Ххадижат. ЦIа ци дизарчагу, алши-талихI бусса бизаннав гьарцагу дунияллийн бувксса оьрчI.

— Цими инсан яла лавгун ур ва шинал?
— Аьпалул хьунни 85 инсан.
— Хъювусул буккансса иш бур дунияллийн бувк­миннал ва дунияллия лавгминнал дянивсса аьдад лап чIирисса душиву.
— Учинмагума къатIааьнну бур.

— ЦIа даххана дуллалисса ишру ччя-ччяни хьунабакьайрив? Ци сававрай даххана дуллан бикIай?
— ЦIанил ялув жула райондалий муксса авара къадикIай. Шинал дянив учIай 10-15 инсан. ХъунмурчIин, диндалул пикрирдайн бувну. Учин захIматсса душиврийн бувнугу даххана дуллан бикIай. Амма закондалий цукун чивчуну бухьурчагу, ЗАГС-рал органдалухь дакъассар ихтияр ми суаллах мюрш бикIлансса. Амма жула инсантурахь анжагъ ца тавакъю бавияв: дахханашиннарду дуллалийни зула аькьлу-кIулшилий кьамул бара цумур-бухьурчагу хIукму.

— Цайми миллатирттах бурувгун, балугъравун къабивсса ташурду лакрал дянив хъинну чанну шай. Ци оьрмулуву ташулул шай жула лак?
— Закондалий ккаккан дурну дуссар магьар бишин бучIисса чIун – так балугъравун ивну махъ, 18 шин бартларгун махъ. На зузиссаксса мутталий хъинну чан­сса хьунни балугъравун къабив­сса ташурду.
Жула райондалий ташу буллалисса инсантурал дянивсса оьрму бур оьрчIал – 25-27 шин, душварал – 20-23 шин. Ттул пикрилий, му къаоьккисса ккаккияр. Цанчирча мунияр ччясса ташурду бикIай гьавасрал биялдарай хьусса. Ми ччяни лигу-лияй. 2001 шинал июнь зуруя шинмай райондалий сияхIрайн лавсун бур 1152 ташу ва 354 личIи шаву. Му 30 процентраяргу гьарза­ссар. Къащисса иш бур. Кулпатру личIи шаврия хъунмур заралгу, хIасратгу оьрчIан дур. Махъсса чIумал ташу личIи бан хьхьичIун хъанай бур хъами. Мунил сававгу, миннах вичIидиширча, дусса дур ужагърай ду-дакъашиврул захIматшивуртту сававну. Мунинсса багьана хъанай бур даву дакъашиву ва арантал хIанттихун багьаву.
Къаччива жула ихтилат паш­­мансса калималий къуртал бан. Мунийн бувну, чIа тIий бура лакрал миллатран дакьаву, цIуллушиву, тIайлабацIу ва барачатшиву. ОьрчIая тирхханну! Ххаришивурттащал духханнав зул ужагъирттайн ялун нанисса шин!

— Барчаллагь, Изольдай. Ялун нанисса шинаву чIяву хьуннав зул идаралийн ххари-хъинсса иширттай бучIайми.

Ихтилат бувссар
Зулайхат Тахакьаевал