Жул «Илчи» кказитрал редакциялий аьдатравун дагьну ду­ссар жаваблувсса къуллугъирттайсса, сий дусса, махъ нанисса миллатрал вакилтуращалсса хьунабакьавуртту. Ва ххуллухсса жул хъамаличу хьунни Дагъусттаннал виваллил иширттал министр, полициялул генерал-лейтенант МахIаммадлул арс Аьвдурашид МахIаммадов.
Хъинну щавчусса графикрах ва мажал бакъашиврух къаурувгун, Аьвдурашидлул чIун ляркъунни, миллатрал кказитрал зузалт­ращал хьунаавкьуну, аьчухсса ихтилат бансса. Министр увкIунни цинявппагу зузалтрансса ххаллилсса бахшиширттащал. Жул хьунабакьавугу дакIний личIансса хьунни. Укунсса даражалул къуллугъчитуран миллатрал кказитрал агьамшиву ва чара бакъашиву бувчIлай бухьувкун, жула ялун бучIантIимунийнсса хьул-умудгу ххишала хъанахъиссар.

— Аьвдурашид, буккарав ина «Илчи» кказит? Бияйрив му вичIан?

— Ттул оьрчIшиву, жагьилшиву буттал кIанттуя архну, гъурбат­рай ларгун дур. Мунияту ттунма ччикун ишлану, кказит буккин къахьурчагу, лакку кказитрай бивщусса гьармуния ттун хавар буссар. Ми ттухь бусай, цавагу номер лях гьан къабивтун, ххал байсса, буккайсса ва «Илчи» кказит хъинну ххирасса ттула ниттил.
Гьай-гьай, гьарица инсаннан кунма, ттунгу ххирар ттула ни­ттил маз, ттула миллат. Лак ччинал дахIалай чинсса, ххаллилсса тарих бусса, пахру бан лайкьсса миллатри.
Агьалинал ккал хIисавравун ларсун, Хъунмасса Буттал кIан­ттул цIанийсса дяъвилийн яла чIявусса жуятувар лавгсса, хушрай лавгмигу жулар чIявусса бивкIсса. Лакрал райондалул дяъвилул шиннардий лув-ялув шамилва занази ЯтIул ттугъ лавсъссар. Му яла абадлий къабивтссар райондалухь.
Зун барчаллагьри жула мазгу, миллатрал культурагу дуруччаврил цIанийсса багьа бищун кьашайсса даву дуллай буну тIий.
— Буси вила нитти-буттая, агьулданул мархха-ххунулия.

— На увну ура Лакрал райондалийсса Кьукуннал шяраву. Ниттил чулуха Увурдал шяраваллищалссагу маччашиву дуссар. Ттул ппу МахIаммад строитель ивкIссар. Ламурду буллай ивкIун ур. Ца ппурттуву даврий цIунцIия хьуну, зун къахъанай, УзбакIнаву ялапар хъанахъи­сса хъунама уссил цачIана увцуну ур. Революция хьуннин ттул буттал ппугу, Термезлив ялапар хъанай, иш бавчуну ивкIун ур. Ттул буттауссугу, буттар­ссугу тийх бувну бур. Бутта­уссу МахIаммадов Рамазан дяъви байбишин хьхьичIсса шиннардий Киеврай университетрал юристал шайсса факультетрайн увххун ивкIссар. Дяъви байбивхьусса чIумал Ейскаллал леххултрал училищалувун ув­ххун, летчик хьуссар. Яла, дяъви байливтIуну махъ, къуртал бувссар университет. Бутта­уссу савав хьунур нагу ттула пиша язи бувгьусса. Бутта увцуну ца-кIира шинава буттауссил жу, оьрчIругу, бувцуну буру.
Школагу, университетгу на къуртал бувссар Самаркьаннай. Дуккаву къуртал хьуну махъ увкIссара Дагъусттаннайн.
-Ччя-ччяни иярав Ла­кку билаятрайн, буттал шяравун?
-На гьарица шинах лагай­ссара Лакрал райондалийн дяъвилул ветерантуращал хьунаакьин. Кьукнивгу ччя-ччяни лагара. ЦIу дуккан дав кIикку нитти-буттал къатри.
Мажал бирияйхту, гъирарай лагара Ккуллал, ЦIуссалакрал районнайнгу. Къащи хъанан дикIай, жула инсантал шагьрурдайн бизлай, лакрал щархъурду дачIра дуклакаву. Жул шяраву бувагу 13 кулпат бур мудан кIиккува ялапар хъанахъисса. Амма махъсса шиннардий, шяраваллаву къатри дуллай, духми цIу дуккан дуллан бивкIунни. Утти шяравун увкIсса чIумал, дакI ххари шай, цIу-цIусса къат­райн ящувкун.

-ВацIилу зунттуцI мурхьру бугьаврил сиптачигу ина хьусса ххай буру?
-Жула лакрал тарихрацIун бавхIусса зунтту бур кIа. Мунияту пикри хьуна, кIа зунттуцIух ттарлил мурхьру бувгьуну, вацIа ххяххан бан. Ттула зузалтращал лавгун, хIавирдугу бувгьуну, чапаргу дацIан дарду. Утти­гъаннугу лавгра мурхьру цукун ххяхлай бурив ккаккан. Шанна метралул лахъ хьуну, бювхъуну бия. Жула хIарачатрацIух Лаккуй ххаллилсса вацIа ххя­хханссар тIий ура. Мива мурхьру бувгьуссар ттула буттал шяраву Кьукнивгу. Зуруй кIийла ттула зузалт гьан бара кIайннуйн щин рутIин. Мукунма 400 мурхь бувгьуссар жу дукIу инттухунмай аэропортрая арх бакъасса ххуллул шанбачIулийгу. Миннуха аякьалийгу жува буссару. Къизилюртуллал райондалийсса Совет Союзрал вирттаврал цIанийсса кIива школалийгу дарду мура даву. Гьашину Хъунзахъиял кьа зунттуйгу, Шамильский райондалийсса Телятль тIисса шяравугу бугьан дакIний буссару мива мурхьру. ХIасил, жула кашилуцIух ва хIарачатрацIух жула кIанттурду чIюлу буллай буру.
-Ххишала бакъа захIмат-жапасса, жаваблув­сса къуллугърай зузисса инсан ура ина хIакьину республикалий. Гьанавиххи хьусса, ци банссарив къакIулну ливчIсса чIуннугу шайрив?
-Мукссава мукунсса тагьарданийн къаагьарчагу, кIири ичин­сса, дакI зия хьунсса чIунну чансса къашай. Яла-яла захIматну бикIай ттула зузалт жагьилсса оьрмулий жандалуцIа хьусса кьурчIисса ишру лялиян бан. Хъиннува захIматну бикIай, миннал нитти-буттащал, кулпатирттащал, оьрчIащал хьунаавкьусса чIумал. Хъуннасса къювуну хьунни ца акъа-акъасса ттула уссу дунияллия лагаву. Гагу виваллил иширттал органнай зий уссия. КъачIявусса ттула дустуран тIааьн бакъасса цичIав хьурча, мугу ттун хъинну асар шай.
Хъинну захIматсса дия, Хасавюртуллал райотделданий зий ивкIсса 90-ку шиннардия айивхьуну, криминал милицанал хъунаманал хъиривчунал къуллугърайсса 2000-ку шинннардийсса чIунну. Гай дия Да­гъусттаннан нигьачIаву дусса, оьлуркъусса шинну. Хъуннасса жаваблувшивугу дия, гьай-гьай, виваллил иширттал органнай. ФСБ-лувасса жула коллегахъащал цачIуну жуща бювхъуна тагьар хъиннура оьлукъин къаритан. Ялагу, хъинну оьлу бизай, ттула структуралувусса зузалт закондалул ххуттава бувксса, тIайладакъашивуртту дур­сса ишру ашкара хьусса чIумалгу. Мукунсса ишру хьун къабитан на хъинну ялув авцIуну уссара. Башттанма бан-битан бухлавгун на тачIав къаливчIссара. Ттула кьянкьа-кьурчIисса пишалулгу, опытралгу, оьрмулул шинналгу сасан увну ура.
-Аьрасатнал регионнал виваллил иширттал министртурал дянив вил рейтинг лахъсса дур тIун бикIай…
-Субъектирдайсса виваллил иширттал органнал каялувчитураву чансса бакъар цала къуллугърал буржру лавайсса даражалий бартбигьлагьисса вакилтал. Учин бучIиссар, цумур-бухьурчагу субъектрай паракьатшиву духьурча, му миннал бюхъулул ва захIматрал ишри. Хъинну кьурчIи бизай цаппара СМИ-рдал, хьхьу-кьини къакуну жу дуллалисса хъуннасса даврияту къатIий, тIайла ба­къасса шярал хаварду ппив буллалисса чIумал. Мукунсса, дугьан кIюй дакъасса, хъирив къалавсса хавардайну изданиярттал цала сий яларай рутлатиссар. Ттун къакIулли миннал изданияр­ттал яла цукун бувчIин байссарив цала гъалатIру буккултран. На критика дикIан къааьркинссар тIий акъара, амма му дикIан аьркинссар загьру къабутIлатIисса, тIайласса, хъинмур чIа тIисса. Журналист жаваблувсса, цала мукъул заллушиву дан кIулсса, цала хIурмат бусса икIан аьркинссар.
Зун кIулссар цаппара шиннардил хьхьичI цукунсса тагьар диркIссарив Дагъусттаннай. ХIакьину жул хIарачатрайну жула республикалий жучIара цин лархьхьусса паракьатшиву дуссар. Амма му паракьатшиву жун ххирану дарцIуссар. Махъсса шиннардий виваллил иширттал органнал 400 зузала жандалуцIа хьуссар. Миннал махъ ливчIссар кулпатру, оьрчIру. Мукунсса иширттал хIакъи-хIисав дан аьркинссар, шаппагу щябивкIун, виваллил иширттал органнай аьйрду ляхълахъиминнал.
-ХIакьину жунма цинявн­нан хъунмасса буру­ккин бур Сириянал билаятрайсса жула жагьилтурал хIакъираву.
-ХIакьинусса кьини, жун кIулну, 1334 дагъусттанчу ур тийх. Ми циняв жун кIулссар, жу миннащал зий буссару. Ми инсантураща ттигу-цIанагу бю­хъайссар цала ватандалийн кIура баен.

-Виваллил иширттал министерствалул баян буллай бур хушрай яра­гъуннищалсса кьюкьрава бувкми уголов жаваблувшиндарайн кIункIу къабантIиссар тIий. Мукунсса цими инсан увкIри зучIан?
-Шинал лажиндарай му масъалалул хIакъираву жучIан увкIунни 44 инсан. Ми букIлай бур, цивппа бяйкьушиврий мукIру хъанай, цIусса оьрмулийн кIура баен ччишиву буслай. Силистталул, миннахь цIухху-бусугу бувну, хъиривлаявуртту дайссар. Агана ми инсантурай хъунмасса тахсир хьуну бакъахьурча, ягу миннал цамур лирданашиву дурну дакъахьурча, АьФ УК-рал 208-мур статьялийн бувну, следовательнал хIукму байссар ми уголов жаваб­лувшиндарайн къабуцинсса. Му следовательнал дуллали­сса бахшиш дакъар, му закондалул тIалавшиннар биттур дуллалисса. Бяйкьу ххуллийн увксса гьарца инсаннаща шайссар му каши ишла дан.
ТIайлассар, Сириянаву­сса, Иракьнавусса жагьилтурал хIакъираву хъиривлаявуртту дан, кIул бан захIмат хьунссар. Амма миннал тIутIимуних, бусласимуних вичIи дишингу, закондалул ххуллийсса хIукму бангу жу хIадурссару.

-Ци учин ччива «Илчи» кказитрал зузалтрахь, бу­ккултрахь?
-Ттул хъунмасса хIурмат бу­ссар зул пишалул чулийнмай, хаснува миллатирттал кказитирттай зузиминнал. Мукъул бияла хъунма­ссар. Мукъул инсаннавун гьава­сгу бутайссар, дакIний щаву дангу бюхъайссар. Мунияту журналистнал гьарзат, хъирив лавну, тIайлану чичаван аьркин­ссар. Ччива зу ххишалану чичлай цукун оьрму бутлай бивкIссарив жула бава-ттаттахъул. ТачIав хъамакъабитай Гъумук дяъвилул ветераннащал хьусса ихтилат. ХIайп, жул хьунабакьаву цалчинсса ва махъра-махъсса хьуна. ВетеранначIату на увкра инсантуран хъиншивуртту дуллансса гьавасрал виувцIуну. Ттун ччива укунсса, аькьилсса, оьрму ккавксса инсантурая буслай жула телевидениялийгу, кказитирттайгу.

-Барчаллагь, Аьвдурашид. Вингу, вил зузалт­рангу ЦIусса шин даркьусса, паракьатсса хьуннав тIий буру.
-Ттула чулуха чIа тIий ура зунгу, зул цинявппа буккултрангу ЦIусса шинаву цIу-цIусса тIайлабацIуртту, ххуй-ххуйсса макьалартту.

Ихтилат бувссар
Р. Башаевлул
Чивчуссар А. Аьбдуллаевал

Хъиривмахъ

ХIакьину Дагъусттаннай ца яла хъунмур ва къювумур къуллугърай зузисса инсан, жула лакрал миллатрал дяниватусса вакил, ур уттинин му даврий зий бивкIцириннаха цаннахавагу къалавхьхьусса. Миннаха лавхьхьусса ча икIави, ва лавхьхьуну чIалачIисса акъар полициялул пишалул инсаннахагума. Ва ххал хьувкун, муниннин ваная цичIав бавну, кIулну къабивкIсса инсаннал бакIраву найбунува хIасул шайсса пикрину лякъинссар: «Интеллигент, резидент, циниягу ца киносурат­равасса персонаж, джентельмен, атлет», — тIисса, ва вайннухара лархьхьусса цаймигу хIисавртту.
Мяйжаннугу, къабикIайхха министртал, генералтал укун­сса чIалачIиндарал. Миннал къалипгу, къуццугу бикIай цамур журалул, цамур занакьулушиндарал.
Амма, чIалай мукун унугу, ванан магьирну кIулли цалла даву, ванал канихь тIуркIу тIисса хханссар цуппа пиша. Ванал гай яла захIматми суа­лла­хьхьун дулайсса жавабругу, бай­сса ихтилатгу бур чантI увкусса, дунияллия хавар бу­сса инсаннал бакIравату ва дакIнивату нанисса. Ванаву дур укунсса къуллугъирттайсса инсантураву чIяруну къалякъай­сса цирив харизма.
Кумунил ялун ххибан ччай ура ца цамур затгу. «Илчилул» коллективращал хьунаакьин, ихтилат бан увкIсса министр­нахь бия жул редакциялий­сса гьарцагу душнин ца-ца язи­сса хъункIултIутIал кацI, ЦIусса шин барча дуллали­сса. Бия цинявннан ца-ца чантай ссайгъатралгу, ялув министерствалул логотипгу, цIагу чирчу­сса. Дия «Илчилул» редакциялул чIирайн лахъансса, ххаллилну щаллу дурсса художествалул суратгу. Ванал хасиятрал ялун ххи дувара утти му чумартшиврул ва чувшиврул видурцIусса лишангу – итталу дацIантIиссар жула Ла­кку аьрщарай лявхъу­сса, оьвхъусса зунтталчунал камил­сса сиппат.