«Илчи» кказитрал ноябрьданул 3-нний бувксса номерданий Алексей ХIажиевлул гьаз бувну бур лакралгу, Дагъусттанналгу культуралуву, просвещениелуву хъинну агьамсса кIану бувгьусса П.К.Услардун (1816-1875) ва мунацIун уртакьну лакку мазраха зий ивкIсса Ккурклиятусса Оьмардул арс Аьвдуллагьлун (Абдулла Омар-оглы) лайкьсса кьимат бищаврил масъала. «Даниял Магьдиевлуйнсса тIивтIусса чагъарданий» Алексей маслихIат бу­ллай ур П.Услардун ва Аь.Оьмаровлун гьайкал дацIан дан Ккур­ккуллал шяраву. ЦIуллу увссара, Алексей!

Дагъусттаннал мазру ах­ттар бавриву барон П.Ус­лардулуксса бутIа цаманал щилчIав къабивхьуссар учивияв на. Ванал, хъинну хъирив лавну, ххал бивгьуссар ххюва дагъус­ттан маз: яру маз, лакку маз, лазги маз (кюринский язык), дарги маз (хюркилинский язык) ва табасаран маз. Ванал «грамматический очеркру» авадансса иллюстратив материал дусса, хъинну мюнпатрансса очеркру бур, гьарцаннул хъиривгу бур дагъусттан мазрал ва оьрус мазрал словарду, буллуну бур личIи-личIисса журалул текстру (учалартту, балайрду, магьри, далиллу). Мунаяр махъ чирчусса грамматикалиясса давурттаву тIурча (ттул ихтилат лакку мазраяр), цичIав вари чинсса, элмулун агьамшиву дусса зат ххи бувну бакъар, так мунал материаллу чIумуха лащан даву дакъасса (Л.И.Жирков, С.М.Хайдакьов, Г.Б.Муркъелинский ва ц.). Ми хьхьарасса элмучитал буну тIий бакъарча, — яла агьаммур тава чIумал П.Услардул тIайлану аьч бувну буну тIий. Шикку на Аьли Къаяев кIицI лаглай ба­къара – ванал даву личIисса, цалалусса, оригиналсса дуну тIий, му лавгмур аьсрулул 20-30-ку шиннардий чирчусса даву дунияллийн дурккунни так 2009-ку шинал, жула элмулул агьулданун личIину итталунгу къадагьунни.
Циванни П.Услар къапкъаз мазру ахттар буллан ивкIсса?
Къапкъаз мютIи бувну, Аьра­сатнал империялувун був­ххукун, аьркинну бивкI­ссар ми кIанттурдал тIаби­аьтгу ххал дигьин, миккусса халкьуннал тарихраясса, миннал багьу-бизулиясса, аьдат-эбадатирттаясса мяълумат­ругу датIин, кIанттул халкь цаятува рязину, цащала бавкьуну бикIаву мурадрай. 1858-ку шинал Къапкъазуллал армиялул ходатайство ккалли дурну, паччахIнал амрулийну, П.Услардул ялув бивхьуссар Къапкъазуллал тарих чичин. Элмийну му даврин аьркин дансса мяълумсса тарихий материаллу дакъа тIий, П.Услар айивхьу­ссар мазру ахттар баврия, цанчирча мазурдиву яшайсса буну тIий му мазрай гъалгъа тIисса инсантурал тарихгу.
П.Услардул гьарца цала ххал бигьлагьисса мазран сакин бувну бур кириллицалул гьанулийсса алфавитгу, му мазраву­сса агьамми чIурду (фонемартту) хIисавравун лавсун. Цанма кумагран мунал лявкъуну бур, чIумух бурувгун, дурккусса (бусурман элму лархьхьусса), ­оьрус мазгу бувчIайсса, кIулсса информатортал. Хъинну рязину бувсун бур П.Услардул лакку мазраха цацIуна зузисса Аьвдуллагь Оьмаровлуятугу.
П.Услардул кумагчиталну зузисса цинявннаву яла машгьурма, оьрус мазрайсса лакрал литературалул бакIрацI хьума Аьвдуллагь Оьмароври учирча, жува къабяйкьинссару. Ванал «Лак яхъанахъисса куц», «МутIаллиблул дакIнийн бичавуртту» тIисса этнографиялул очеркру бур литературалул произведенияртту, утти ва журалийн эссе учайнуккар.

Жула лакрал элмулулгу, литературалулгу усттартал Аьвдуллагь Оьмаровлул чIарах бувккун бакъар. Ванал оьрус мазрайсса давуртту дур­ккунни кIийлла. МиннуцIунсса хьхьичIмукъуву гьарта-гьарзану бувсун бур жула шаэр ва филологиялул элмурдал доктор А.ХIусайнаевлул. Муная «Бунагь бакъа бунагьлув» тIисса ххаллилсса поэма чивчуну бур лакрал литературалул ттарцIну хьусса Юсуп Хаппалаевлул.
Аьвдуллагь Оьмаровлул хъуннасса даву дурну дур лакрал халкьуннал дакIнихсса творчество датIавривугу – учалартту, магьри, бусалартту, далиллу. Муналва чивчуссар цалчинсса лакку мазрал азбукагу («Аьшлахьхьу»), цалчин муналли школалий (Гъумук) лакку мазрал дарсругу дирхьусса. Му алфавитрай бу­ккинмур бикIаншиврул муналва чивчуссар лакку мазрайсса хIисаврттал лугу («Арифметика»), лакку мазрайн таржума бувссар Ушинскийл «Вода, воздух и их видоизменения» тIисса оьрчIансса лугу. На ми жужру, Э.Х.АьбдуллаевлучIату лавсун, жула цIанасса графикалийн бувцуну, компьютерданийн лавсъссия, жула кказитрайгу бивщу­ссия. Амма а-ия учинсса, мувгу буккарду, къабуккарду учин­сса цучIав къаувккуна, математикалул учительтуранвагу интерес бизанссар тIий буссияв – авай! Мунияту «Аьшлахьхьугу», «Щин ва гьавагу» цимигу шинни ттул компьютерданийва ливчIун. Ми буссарча, бищун къашайвав увкукун, нава зузи­сса идарарттайсса хъуниминналгу бакI къадургьунни.
Ча, укунсса бур бусрав-барчаллагь жула мазгу, тарихгу ябавриву хъунмасса кIану бувгьусса вай кIиягу адиминал – П.Услардул ва Аь. Оьмаровлул. Гьу, итанну Аьвдуллагь лаккучу ур, мунияту бюхъай мунал хъирив букканми, му гьаз анми бакъатIий чулух ливчIун икIан. Амма махIатталсса зат бур, 2016-ку шинал увну 200 шин хьусса П.Услардул цIа зумухрагу къаласаву, ссал-ссал бунугу цIаний форумру, «ккуркки столлу» буллалисса жула хъуниминнал. Цавагу элмий институт, идара ба­къар ванал цIа дирзсса. Ттул пикрилий, оьрус мазрал учительницаннияр хьхьичI гьайкал дацIан дан аьркинссия П.К.Услардун.
Мунияту ттун хъинну дакI даркьунни Алексей ХIажиевлул инициативалий. Амма на му Ккурклив дацIан къадавиявча – микку му щин ккаклантIиссар – Дагъусттаннал хъун шагьруну хъанахъисса МахIачкъалалив, я Академиялул институтрал хIаятраву, ягу цания-ца вузрал хьхьичI дацIан давияв.
Лакку маз ахттар бавриву вицIхъиял лугъатрая гъалгъа тIурча, Аьвдуллагьлул маз – му лугъат бакъар, му бур Ла­ккуй ишлану бивкIсса литературий маз, му мазрай дур Аьли Къаяевлул чичрурдугу (Аьли-кьади вицIхъиял лугъатрай акъахьунссияхха чичлай). Цуппа вицIхъиялмур лугъатраву чIярусса цайми-цаймигу аьла­матру дуссар, П.Услардул грамматикалуву дакъасса, масала, цаппара позициярттай аьчух чIурду бакъа хъанахъаву (кIяласса /кIлясса, хьхьири /хьхьри ва ц.). ВицIхъиял лу­гъат ххуйну ххал бивгьунувагу ба­къар, ай му П.Услардул ахттар бувссар Аьвдуллагь Оьмаровлул мазрая куну. Аьвдуллагьлулмур маз тIурча, бур та чIумал ишласса литературий маз, ­аьщуйн щуну учин – Гьухъаллал лу­гъат. Аьли Къаяевлул увкумуних вичIи диширча, ВицIхъиял махIлалул центрну бивкIун бур Гьухъал. Гъумучи ва Гьухъал чIарав бунугу, Гъумучиял лу­гъатрал личIишиву дикIайва: кIайннал мазраву бур мурччал чIурду ( кIва, гва, ккваччи, ччваву…), вицIхъиялгу, гьухъаллалгу лугъатраву мукунсса чIурду бакъар. Ми чIурдугу бусса бухмур лугъат, ттул пикрилий, яхьуну бур Хъусрахь. ХIайп, жула лугъатру ттигу-шилагу багьайкун ахттар бувну бакъашиву: С.Хайдакьовлул диалектологиялул очеркру – му диалектология бакъар, очеркирттаву ккаккан бувну бикIайссар, куртI къавхьуну, яла чIалачIимур, ­иттав ххяхлахимур, гихунмайгу ххал бигьин аьркинмур. Масала, ккуллал, ваччиял лугъатраву яхьусса глаголданул формарду (учIайр, лагайр), цаймигу агьамсса затру очеркирттаву бакъар. ГрамматикалуцIун бавхIусса чIявусса затру уттигу ххал бувну бакъар. Му даву данма укканшивугу къакIулли.
Ча, кутIа бан, на хъинну ххари бувунна Алексей ХIажиевлул «чагъарданул».
Мусихъал (Эльдарова) Роза