«Взаимодействие языков и культур при изучении русского языка как неродного: опыт и перспективы» цIанилусса щалагу Аьрасатнал элмийсса конференция хьунни МахIачкъалалив Р. ХIамзатовлул цIанийсса Национал библиотекалий.Мунивух гьуртту хьунни республикалул школарттал оьрус ва дагъусттаннал мазурдил учительтал, кIулшиву дулайсса личIи-личIисса идарарттал вакилтал, вузирдал студентътал.

Бадрижамал Аьлиева
[dropcap]М[/dropcap]икку доклад бунни ДНЦ-РАН-данул Мазрал, литературалул ва искусствалул институтрал директор МахIаммад МахIаммадовлул.
— Аьлимтурал бусласимунийн бувну, республикалий официалну бур 32 маз, миннувату 14 бур чичру дусса ва 18 чичру да­къасса.Тарихрал личIи-личIисса чIуннардий жулва инсантурал ишла дуллай бивкIун бур личIи-личIисса чичрурду. Масалдаран, V-мур аьсрулий диркIун дур цилла чичрулущалсса Ккавкказуллал Албания тIисса хIукумат. Дянивми аьсрурдай Ккавкказнавун дуркIун дур ислам дин, мунищал архIал – аьраб чичругу. ХVII аьсрулия байбивхьуну, аьрабнал графикалул гьанулий дагъусттанлувтурал сакин дурну дур цалла чичру – ­«аьжам» ва му хъинну машгьурну диркIун дур.
Тарихийсса литературалуву хьунадакьлай дур Дагъус­ттаннал халкьру Октябрь революция хьуннин дукъаркку­сса бивкIссар тIисса чичрурду, амма му къатIайлассар. Совет заманнайсса цIа дурксса востоковед Клечковский чичлай ивкIссар, дурккусса инсантурал ккал хIисавравун ларсун, Дагъусттан европанал итххявхссар тIисса цимивагу билаятраяр хьхьичI бушиврия, — увкунни МахIаммад Ибрагьимовичлул.
Мунал мукунма гьаз бунни цайми масъаларттугу. Масалдаран, Дагъусттаннай хIасул хьушиву, литературалул мазраха къалавхьхьусса, кIанттул ляличIиссава оьрус маз. Му тагьар, чIаххуврайсса республикарттах буругларча, жулламур республикалий дусса дур хъиннура ххарарххусса. Ванал мукъурттийн бувну, миллатир­ттал мазру буруччаврийн тIайла дурсса давуртту дуван аьркинну бусса бур. МазурдицIун дархIуну хIакьинусса кьини хIасул хьу­сса тагьар даххана хьуншиврул кьамул дуван аьркинну бур Да­гъусттаннал мазурдийн дагьай­сса зузисса закон.
Гихунмай ихтилатру бунни МахIачкъала шагьрулул 38-мур гимназиялул завуч Светлана Новодворскаял ва цаймигу учительтурал.
Конференция лахъи лавгуна кIива гьантлийсса. Мунил гьур­ттучитал бивунни Дарбант шагьрулийнгу.