[dropcap]Н[/dropcap]оябрьданул 20-нний Ма­хIачкъалалив Р. ХIам­затовлул цIанийсса Национал библиотекалий хьунни халкьуннал творчествалиясса, фольклорданул ирсираясса ва этнографиялиясса видео ва анимациялул фильмрдал«Ссурулккур­тта» тIисса цIанилусса ХV конкурсрал ва «Культура-онлайн» конкурсрал хIасиллу дуллали­сса батIаву.

Бадрижамал Аьлиева
«Ссурулккуртта» гьашинумур конкурсрайн тIайла дурккун дур жулва билаятрал личIи-личIисса субъектирдаясса 60-хъул давур­тту.
Конкурс дуллай бур, мунил жюрилул председатель, «Дагъус­ттан» ГТРК-лул директорнал хъиривчу Ссалам Хавчаевлул тIисса куццуй, дагъусттаннал кинораха зузиминнал ккуран гьарта-гьарза даву, мунил пишакаршиву ларай даву мурадрай.
— Конкурсраву гьуртту хъанахъиминнаву бия пишакарсса кинодеятельталгу, му давриха цала тархъансса чIумал зузимигу. Уттинин «Дагъусттан» ГТРК-лий кка­ккан дурссар 5 фильм – 2017-ку шинал конкурсрай язиминнун ккалли дурсса. Барча буллай ура цинявппагу лауреатътал. Жу мудангу хIадурссару зун аьркинсса ка-кумаг буван, — увкунни С. Хавчаевлул.
Гьашинумур конкурсрал лауреатъталну Дагъусттанная хьунни МахIачкъала шагьрулиясса, Бущихъиял, Гумбетуллал, Къайтагъуллал, МахIарамккантуллал, Нугъайнал, УнцIукIуллал район­ннаясса гьурттучитурал ларсъсса фильмру.
«Культура-онлайн» конкурсрай личIи-личIисса номинациярттай лауреатътал хьунни республикалул 20-нния ливчусса культуралул центрду.
ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадовал кIицI лавгунни ххуй-ххуйсса видеофильмру, видеороликру, халкьуннал творчествалийн дагьайсса программартту ласаву ва искусствалул цаймигу журарду иширайну щаллу даву хъанай душиву, анжагъ жула культуралул ва тарихрал лавгмур ябаву, буруччаву бакъассагу, ялун нанисса ник художествалул, рувхIанийшиврул ирсирал мисаллай тарбия давунугу.
ДакIнийн бутанну вай конкурсру дуршиву ДР-лул Культуралул министерствалул, Республикалул Халкьуннал творчествалул къатлул, «Дагъусттан» ГТРК-лущал ва «Дагъусттан» РГВК-лущал цачIуну, Аьрасатнал Культуралул министерствалул ва ПаччахIлугърал Аьрасатнал Халкьуннал творчествалул къатлул чIарав бацIаврийну.