1999 шин лухIи кьинину лирчIунни Дагъусттаннал тарихраву. Тай дяъвилул яла цIаран лавхъми гьантри ЦIуссалакрал аьрщарайри хьусса, цIуссалакрал агьулданиятур яла чIявусса ливтIусса ва бивщуссагу хьусса.

[dropcap]В[/dropcap]иваллил иширттал зузалтгу, щалла райондалул агьлугу ца хьуну данди бавцIуссар ярагъуннил балгусса къачагътурайн. Гьашину 18 шин бартларгунни ЦIуссалакрал виваллил иширттал зузалт ва ополчентал райондалийн ххявхсса къачагътурал кьюкьраяр ххув хьуну.
Тания шихунмай гьарица шинах ЦIуссалакрал райондалул жяматрал ва тай иширттавух гьуртту хьуминнал дакIнийн бичай Ватан дуручлай къучагъшиврий жанну дуллусса полициялул зузалт. Гьашинугу, сентябрь зурул 16-нний, ЦIуссалакрал шяравун бувкIун бия дяъвилул ишру нанисса чIумал сакин був­сса штабрал хъунаману ивкIсса (танийсса Дагъусттаннал ХIукуматрал председательнал хъиривчу) Амучи Амуттинов бакIчисса делегация. Дяъвилул иширттаву жанну дуллуминнансса гьайкалдануцI тIутIивгу дирхьуну, вай хьунабавкьунни Хасаврай ополчентурал кьюкьраву бивкIминнащал.
— ХIакьину, цIунилва-цIунил тай ишру дакIнийн бичлай, ттул бакIравусса пикригу, дакIнивусса хиялгу ца бур – тачIав дяъви къахьуннав тIисса.
Цала-цала пишалий зун аьркинсса строительтуран, экономистуран, ярагъгу кIунттил бувгьуну, дяъвилийн буккан багьунни. Тай дяъвилул иширттал чIалачIи дунни жандалия ка гьаз дурну талай бивкIсса жула халкьуннал къучагъшиву, — тIий ур Амучи Амуттинов, цIаран лавхъсса сентябрь зурул гьантри дакIнийн бичлай.
Жул корр.