Къазахъисттаннай навтлил мяъданну буккаврил бакIщаращуй лакгу бивкIссар
Цаппара номердал хьхьичI жу бувсъссия Къазахъисттаннайсса Дагъусттаннал диаспоралул даврия. Цалчинсса дагъусттанлувтал тихун бивзун бусса бур 1877 шинал, цивгу паччахIнайн къаршисса бунтравух гьуртту шаву сававну ссивир бувсса.
[dropcap]Х[/dropcap]ъунмасса Буттал КIанттул цIанийсса дяъвилул шиннардий Дагъусттанная Къазахъисттаннайн бизан бувну бур Кировлул цIанийсса аьрали завод – 11азара пишакар ва зузала. Цимиягу азара инсан гьуртту хьуну ур целина кIикIавриву. Дяъвилул махъсса шиннардий букIлай байбивхьуну бур комсомолданул стройкардай зунсса жагьилсса пишакартал. 
Дунияллийх цIа ларгсса дагъусттаннал сянаткартал (заргалтал, ссяткартал, тIахIунтту дувулт) Тупкараганнал аьрщарайн бизлай байбивхьуну бур 1950-ку шиннардий.
Дагъусттаннал диаспора лапва гьарта-гьарза хьуну бур Мангишлакрай навтлил, газрал, урандалул мяъданну буклай байбивхьусса ппурттуву. Къазахъисттаннай навт буккаву хьхьичIуннай давриву хъунмасса захIмат бивхьуну бур лакралгу. Тийх яла куртIмур навтлил къуви дуркману машгьур хьуну ур техникалул элмурдал доктор, Къазахъисттаннал ССР-данул ва СССР-данул ПаччахIлугърал премиярттал лауреат, Къазахъисттаннал республикалул бусравсса мяъданну букку Билал Хахаев.
Баргълагавал Къазахъисттаннал навтлил ххуллу бишаврил бакIщаращуй ивкIун ур ГьунчIукьатIрал шяраватусса ХIажи Мудунов. Зий ивкIун ур «Мангишлакнефть» ПО-лул дуллалисса предприятиярттал дирекциялул хъунама бухгалтерну. Къазахъисттаннал навтлил промышленностьрал отличник, технический элмурдал кандидат, «КазМунайГаз» АО-лул ООС-рал департаментрал каялувчи Руслан Адиевлул канилух бувккун бусса бур навт ва газ буккаврийн багьайсса 100-ния ливчусса документру. Ванал итабавкьуну бур оьрус-къазахъ-ингилис мазрайсса навтлил терминнал словарь.
Мукьардал шяраватусса ХIусман АьвдурахIманов, Башкирнаву Новоуфинскаллал навт буккай заводраву зий даврил опыт бусса лавайсса даражалул пишакар, 20 шинай зий ивкIун ур аппаратчикну, яла ХГМЗ-лул кислородный цехрал каялувчину. Ванал сурат хIакьинусса кьинигу дусса дур ХIурматрал улттуй.
ТIааьнсса лахIзарду чIявур
[dropcap]Г[/dropcap]ьунчIукьатIрал шяраватусса Шамсулваранал арс Дандамаев Муса, МахIачкъалалив строительный техникум къуртал бувну, дяхтта зий, хьхьувай дарсирайн занай, ДГУ-рал инженерно-строительный факультетгу къуртал бувну, зий ивкIун ур «Дагколхозстройрал» объединениялий.
Актаулийн увкIун ур 1978 шинал, ПУС-рал (Прикаспийское управление строительства) оьвкуну. Гикку бивтун бур усттарная вице-президентнайн ияннинсса ххуллу. Му управление цурдагу диркIун дур Москавуллайн мютIисса, щала Актау шагьругу багьлай бивкIун бур Аьрасатнал машиностроениялул министерствалийн. Союз ппив шайхту, му управлениягу ларкьуну дур. Муния махъ зий ивкIун ур Къазахъисттаннал республикалул шагьрулул къатри баврил управлениялий. Ва ур Къазахъисттаннал бусравсса строитель. Лайкь хьуну ур чIярусса медаллан ва паччахIлугърал наградарттан. КIира шин хьуну дусса дур пенсиялийн увккун. ДачIи шинал хьхьичI ивзун ур Москавлив арсначIан. Актаулий ялапар хъанай бусса бур ца арс ва душ.
«Ттула оьрмулул 56 шин на гьан дував строительствалул давурттай зий. Миннува 40 шин – Машгишлакрай къатри дуллай. Шийх чIявуми объектру ттул гьурттушиндарайну бувссар. Хъамалу бувкIминнан шагьру ххуй бизлай чIалай, нава оьрму нахIакь къабувтун бур тIисса ххарисса асардал дуцIай дакI. Ва шагьрулий ялапар хъанай уссаксса гъурбатрай ушиву асар къавхьунни, дакIнийн бутансса тIааьнсса лахIзарду чIявур. ТIааьн бакъасса ишру хьушиву дакIнийвагу бакъар», — тIий ур Муса.
«Ххарира шагьрулул тарихрай ттула захIматрал хха кьабитаврия»
[dropcap]Г[/dropcap]ъумучатусса СалихI Мухтаровлул арснал Мухтардул мукьа арс – СалихI, Наби, ХIусайн ва Мурад строительтал хьуну, бивзун бур Къазахъисттаннайн. СалихI, МахIачкъалалив строительный техникум къуртал бувну, 1974 шинал увкIун ур Мангишлакрайн, тийх аьрщи сукку хьусса чIумал строительный кьюкьлуву леркьсса къатри цIу дуккан дуллан.
Зий ивкIун ур Прикаспийский горнометаллургический предприятиялий къатри дуллай. Ванал бусласимунийн бувну, зунттал промышленность хьхьичIуннай даншиврул, ва предприятиялул цIаний бувну бусса бур Актау шагьру (хьхьичIвасса Шевченко).
ЦIанакул СалихI зий ур «Каскор СМУ» АО-лул хъунама директорнал хъиривчуну.
«Жагьилну бувкIун, дакIнийн бутанмур чIявур. Шаппай гьан-бучIан буруккин къабикIайва тани, гьантлун шанна-мукьра рейс дикIайва МахIачкъалалив. ДакIнийн багьтари ивзун гьан шайва, кIира ссятрава шавай ияйвав. ХIайп тIий акъара шихун изаврия. На дахьа шихун увкIсса ппурттуву шагьрулий дурагу ххюра район дия. Шинну наниссаксса, шагьругу гьарта-гьарза хъанай бур. Мастерну, прорабну, участокрал каялувчину, директорну зузиссаксса мутталий нара ка ларсса къатрах уруглай, дакI ххари шай, ттула захIматрал хха кьабитаврия.
«Шагьру хъунма хъанай, жу хъунив хъанай»
[dropcap]М[/dropcap]ухтаров Мурад Актаулий ялапар хъанай хьуну дур 35 шин. Ва увкIун ур МахIачкъалалив строительный техникум къуртал бувну, зий ивкIун ур ПУС-рай союз ппив хьуннин. Яла тIиртIуну дур цува заллусса строительствалул предприятие «Жана-Кумух» ТОО. Хьуну ур техникалул элмурдал доктор. Даврия мурахасъсса чIумал машхулну ивкIун ур спортрахун, «Динамо» тIисса карунний бияврил клубраву. ЛичIи-личIисса турнирдай, чемпионатирттай таманссалийла ххув хьуну ур.
Ванал хъунама арснал Москавлив гьашину къуртал бувну бур медуниверситет. ЧIивима, навтлил институт къуртал бувну, зий усса ур Актаулий.
«Хъунмур оьрму лавгунни шийх. Жу хъуни хъанай, шагьругу жущал хъунма хъанай бия. Лакрал чIирисса диаспоралул биялсса захIмат бивхьуссар, жула оьрмулул яла ххуйми шинну ва шагьру бацIан бан харж дурссар. ДакI дарцIуну учин бюхъанссар, Мангистауллал аьрщарай зун бувкIцири лакрал бусравну оьрму бувтссар ва бутлай буссар, Дагъусттаннал цIа-кьини лайкьну дурурччуссар, куну. Жула тарихийсса ватандалиягу якъабувцссару, ччя-ччяни бучIайссару. Къазахъисттан жул кIилчинсса ватанну хьуссар. Шийх ччаннай бавцIуссару, кулпатру хьуссар».
«Ччива ппухълуннал миналийн иян»
[dropcap]Х[/dropcap]ъусрал ЧIаратусса ЯхIиянал арс Рустамов МахIаммад хъуна хьуну ур Азирбижаннаву. Яру тIитIиннина азирбижан мазрай гъалгъа тIий айивхьуну, школалийн гьаннин цавагу махъ оьрус мазрай къакIулну, тайннал миллатрал инсаннан хIисав айвав тIар гьарцаннал. Мяйва класс къуртал бувну бур Азирбижаннай. «Лак тачIав янин ххал къахьурчагу, ттун чIивинияцIа кIулссия нава ляличIисса миллатрал инсан ушиву. Лаккуйнгу цалагу къаивссара, амма кIулссия Хъусрахь ттула мачча-ляхъин Раджабовхъул ялапар хъанай бушиву. Утти кIайгу миха-тиха бивщуну бусса бур. Ччива кIайннащалгу хьунаакьин, ппухълуннал миналийнгу иян», — тIий ур.
Буйнакскалий Финансовый техникум къуртал бувну, ЦIуссалаккуй зий ивкIун ур. Аьралуннаву къуллугъ бувну зана хьуну махъ, 1981 ивзун, тания шинай ялапар хъанай усса ур Актаулий, Мангишлакрал областьрал финотделданул ва налоговый комитетрал ревизор-инспекторну зий. 1999 шиная шихунай каялувшиву дуллай усса ур «Мадина» ТОО-лий. Футболданухун машхул хьуну, цила чIумал уклай ивкIун ур «Труд» командалуву. ХIакьинугу ва усса ур шагьрулул футболданул ветерантурал советрал член.
ХьхьичIунсса силисттачи
[dropcap]Ш[/dropcap]авкIуллал шяраватусса Будайчиев Камил Аьбдуллагьлул арс увну ур Бухмур Жытубайрай. Ванал нину-ппу шихун бивзун бур институт къуртал бувну махъ. Камиллул школа къуртал бувну бур Актаулий. Ш. Есеновлул цIанийсса институтрал юридический факультет къуртал бувну, шагьрулул низам дуруччай органнай зий хьуну дур 10 шин, участковыйну айивхьуну, хъинну агьамсса деларду аьч дуллалисса хъунама силисттачинайн ияннин. ЦIана полицанал майорнал чиндалий зий ур шагьрулул хъунмур департаментрай оператив даврий. 
Низам дуруччай система революциялул шиннардия махъ цалий дарцIусса куццуй даххана къархьуну дур, тIий ур.
Нину-ппу ччяни дунияллия лавгун, Камиллун багьну бур, бигьа дакъасса даврицIун, кулпатралмур хъаргу цайнна ласун. Буцири гъан-маччамигу Дагъусттаннай ялапар хъанай буну, ванал бакI буккан бувну бур цаярва мюрщисса уссу ва ссу.
«Зий ура билаятрай хьхьичIунсса идаралий»
[dropcap]Г[/dropcap]ьамиящиял шяраватусса Рамазанов Гъазали МухIуттиннул арс Харьковрай автодорожный институт къуртал бувну махъ тIайла увккун ур Актаулийн. 1987 шиная 1993 шинайн ияннин зий ивкIун ур ПГМК-лий автотранспортрай. 
Яла зий ивкIун ур навтлил ххуллурду бихьлахьисса объединениялий мастерскойрдал каялувчину, цIана му компаниялун цIа дусса дур «КазТрансОйл», навтлил транспортировкалуха зузисса Къазахъисттаннай яла хъунмур транспортрал компания. Хъуни бувну бур арс ва душ. Есеновлул цIанийсса университет къуртал бувну, тийхва зий бусса бур.
«Увссара Уральскалий, хъуна хьуссара Гурьеврай, учIи лявхъссара Актаулий»
[dropcap]Л[/dropcap]ахъирдал шяраватусса Аьвдуразакьлул арс Расул АхIмадов увну ур Уральскалий. Нину-ппу шиккун бивзун бивкIун бур Волгоградрая дяъвилул шиннардий лихъабувккун. 
ОьрчIшиву ларгун дур Гурьеврай. Тиха Шевченколийн ивзун, цал ссяткарну, яла «КазТрансОйл» компаниялий зий ивкIун ур. Пенсиялийн уккайхту цIуницIакул цала сянатрайн кIура авну ур. Ччя-ччяни лагайсса ур Лаккуйн. Махъсса чIумал чялишну къатри буллай сукку хьуну бур Лахъирив. Муния ххарину ура тIар.
Шамилчинсса ник хъунна хъанай дур
[dropcap]Г[/dropcap]ьунчIукьатIатусса Дандамаев Рустамлул нину-ппугу цалчинсса дагъусттанлувтуравух бивзун бусса бур 
Къазахъисттаннайн. Утти шамилчинсса ник хъунна хъанай дусса дур Актаулий. Нину-ппу пенсиялийн буккайхту, гайннащал Дагъусттаннайн ивзун, пединститутгу къуртал бувну, ишбажаранчишивруха зий ивкIун ур. АцIра шин МахIачкъалаливгу дурну, махъунай зана хьуну, Ш. Есеновлул цIанийсса университет къуртал бувну, строительствалул аралуву зий усса ур. Хъуни буллай ур кIия арс ва ца душ.
«Илкинсса авлахърах эшкьи хьуну уссияв»
[dropcap]Г[/dropcap]ъумучатусса ЧIивиев Рамазан МахIаммадлул арс, Аьралуннаву къуллугъ бувну махъ, буттарссийчIан хъамалу увкIун, 
Центральный Азиатский юридический институтравун дуклан увххун ур. Университет къуртал бувну махъ зун лавгун ур Гъумукун. Амма, авлахъ, тархъаншиву ххуй дирзун, дакI махъуннай кIункIу тIий, Актаулийнай зана хьуну, ишбажаранчишивруха зий айивхьуну ур. Актау ялагу ххирар тIар низам цIакьсса шагьру буну тIий.
Мангистауллал аьрщарай лакрал хъатIи
1989 шиная шихунмай Актаулий ялапар хъанай бур Хъусращатусса Закарияевхъал кулпатгу. Геннадий – хьхьичIунсса участковый терапевт. Бурлият – хьхьичIунсса ишбажаранчи.
Гъинттул вайннал ужагърай хьунни хъуннасса тирхханну – хъунама арснан Муслимлун бунни ххаллилсса хъатIи, Актаулийсса лак ва Дагъусттаннаясса цала гъан-маччамигу бавтIун. Бувцунни Мангистауллал аьнтIикIардавасса ца – Милана. Дагъусттаннал ца яла цIадуркмур балайчи Лариса ХIажиевал балайрдал хIайран бувну бия Актауллал агьлу. Ванихун руцлай ия цIанихсса музыкант База Даллаев. Дагъусттанная бувкIсса хъамалгу хIайранну ливчIунав тийх ялапар хъанахъисса личIи-личIисса миллатирттал ансамбльлал къавтIавурттая. Гъан-маччами хъатIуйн гьан-бучIан Бурлиятлул цила харжлугърах бувгьуну бия хъунма автобус. Та хъатIуйнсса аьрххи багьана хьунур ттухьхьунгу Актаулийсса лакращал хьунабакьинсса сант дирирсса. Ва шадлугъ сававну кувннащал кув кIул хьунни тийхва ялапар хъанахъиссагу, Дагъусттанная бувкIссагу лак. Барчаллагь хьуннав Закарияевхъал кулпатран. Муслимлул ва Миланал ташугу талихIрайн букканнав! Актаулий ялапар хъанахъисса дагъусттанлувтуран эбратрансса кулпат хьуннав!
Репортаж хIадур дурссар
Зулайхат Тахакьаевал
