[dropcap]А[/dropcap]хттая ссят 4 хьусса август зурул 28-мур кьини дия. Ттула телефондалий Мариян Дандамаевал занг рирщусса чIумал, на циваннив кIунттил бувгьуну уссияв Апанни Къапиевлул «Шаэр» тIисса лу. Телефондалувух цакуну бавсса махърунугу хьуна: «Папа умер», — тIисса Марияннул махъру.
[dropcap]М[/dropcap]ахIаммад Дандамаев увсса кьини дучIан ливчIун буссия бувагу ххюва гьантта, сентябрьданул 2-нний мунан хьунтIий дуссия 89 шин.
«Шаэргу» канихьва бунува, на пикрирдавун лавгунав. «Лавгунни утти Дандамаевгу. Цукунсса дуссар вай кIиягу, цаннаха ца къалавхьхьусса, инсаннал дянивсса дахIаву? Шаэр ва Аьлимчу. Апанни Къапиевлул девизну бивкIун бур укунсса махъру: «Эй вы, люди, да здравствует ваше будущее!». МахIаммад Дандамаев тIурча, ссавурданий, уххаву-авчIаву къакIулну, ттерихлай, лахьлай ивкIун ур ттуршукурдал манзилданийсса Вавилоннал кьюлтIсса чичрурду. КIиягу бувну бур Лакку билаятрай: ца – Гъази-Гъумук, вама – ГьунчIукьатIув. КIиягу — ляличIиссава гьунарданул заллухъру.
Цаннал гьунарданий лявхъуну бур цаннияр ца ххазина_сса асарду: «Чарийсса накьичру» — зунттал халкьуннал балайрдал одиссея; «Фронтрай дурсса чичрурду» – дяъвилул лажин цурда дусса куццуй художествалул суратирттайну ккаккан дуллалисса; очеркру, макьалартту.
Ваманал караматсса хъиривлаявурттайну лявхъуну бур цаннияр ца язисса ацIния кIива элмулул лу: «Цалчинсса Ахаменидтурал чIумалсса Иран», «Жулла эра дучIан хьхьичIсса VII-VI аьсрурдайсса Вавилоннал лагътал», «ХьхьичIазаманнул Ираннал культура ва экономика», «Вавилоннал хатIбихьулт» ва м.ц. Дунияллул даражалийсса аьлимчу – гигант! ТIайланасса Микеланджело!
БивкIулул зевххунни жущава хъунасса аьлимчу. Амма ливчIунни дунияллий багьа бищун къашайсса аьлимчунал захIматру, лирчIунни мунал иман ххисса симан жулла дакIурдиву.
Дагъусттаннал халкьуннал художник
Арсен Къардашов,
Санкт-Петербург
31.08.2017 ш.
