КIулшивурттал ххуллийн буклакисса цалчинсса кIюрх

Гьашину Лакрал райондалий школалийн лавгунни 1000-ннийн бивсса оьрчIру. Миннава цалчинмур классравун лавгунни 100-нния ливчусса. Гъумучиял школалийн 1-мур классравун лавгунни 38 оьрчI, Щарав – 9 , Хъурхъив – 4, ШавкIрав – 3, ЧIурттахь – 5 , Ххюлусмав – 3, Хьурив – 5, Хъунав – 3, Кьубав – 4, Ккурклив – 4, КIундив – 4, ЧIарав – 5, ГьунчIукьатIув – 8, Карашав – 3, Кумав – 3, Урив – 4, Инишав – 1.


Зулайхат Тахакьаева
Сентябрь зурул цалчин­сса кьини школалий яла агьамми инсантал бур дахьва байбихьулул классравун наними ва хъунмур къулагъасгу, гьай-гьай, миннах дур. Гъумучиял оьрчIал багъраву аьдатравун багьну бур цалчинмур классравун нани­сса оьрчIру, хьхьичI цалла дайдихьулул тарбия ларсъсса идаралийн бувкIун, цахава аякьалий бивкIсса зузалтрахь барчаллагьгу увкуну, гичча школалийн биян байсса.
Дур Лакрал райондалий цIакь хьуну ца цамургу хъин­сса аьдат – администрациялул зузалт лагай гьарца шяраваллавусса школарттайн цIусса ду­ккаврил шин барча дан.
КIулшивурттал кьини Гъумучиял школалул учительтал ва дуклаки оьрчIру барча бан бувкIун бия райондалул бакI дургьуми, идарарттал каялувчитал.
Сентябрьданул цалчинсса кIюрх кIулшивурттайнсса ххуллуну хьунсса мюрщулт Хъун дяъвилия зана къавхьуминнан­сса гьайкалданучIан шадлугърал линейкалийн буккан бувуна 11-мур классрал оьрчIал каругу дургьуну.
Учительтурангу, дуклаки оьрчIангу тIайлабацIусса шин чIа тIисса ихтилатру бувуна Лак­рал районданул бакIчи Юсуп МахIаммадовлул, КIулшиву дулаврил управлениялул каялувчи Явсупи ХIамзаевлул. Ларгсса дуккаврил шинал хьхьичIунсса ккаккияртту хьун дурсса оьрчIан школалул директор Ххадижат ХIусниевал дуллуна ХIурматрал грамотартту.
Цалчинмур классравун наниминналгу ххари бувна циняв­ппа – школалухасса ва учительтурахасса назмурду пасихIну ккалай.