ДР-лийсса Аьрасатнал пенсион фондрал отделениярттайн, СССР хIукуматрай бувсса оьрчIру бусса пенсионертуран пенсияртту гьаз буллалиссар тIий, цIухху-бусу буллалисса бур чIявусса агьали.
Мунил хIакъиравусса бувчIин бавуртту дуллай ур Дагъусттаннал пенсион фондрал каялувчинал хъиривчу Нуруллагь Сулайманов.

Ванал бувсунни интернетраву тIайла дакъасса информацияртту занай душиву.
— Пенсиярттал перерасчетру дуллалиссар 2015 шиная шихуннай. Статистикалийн бувну, перерасчет цинявннан хайрну къадацIлацIиссар. Гьарица инсаннал стажрая ва мунал оьрчIал аьдад­райн хъар хъанахъиссар пенсияр­ттал перерасчет, — тIий ур ва.
Сулаймановлул балжину бувсунни, зузисса инсантурал страховой взносру къадичлай бивкIсса шиннардихлугу пенсион баллу багьлай бушиву. Ми баллу буллалиссар оьрчI бувну, мунан шин ва дачIи, ягу 6 шин хьуннин оьрчIах буруг­лай бивкIсса ниттин ягу буттан – цания цаннан.
Аьрали къуллугъ буллай бивкI­миннан;
1-мур группалул мушакъатшиву думиннаха, мушакъатсса оьрчIаха ва оьрмулул 80 шинава тихунмай­сса инсантураха къуллугъ буллай бивкIсса инсантуран;
Контрактрай аьрали къуллугъ буллай бивкIсса кулпатирттан, 5 шинал стаж хIисавравун лавсун;
Чил билаятирттайн Аьрасатнал федерациялул консульствардал идарарттай зун тIайла бувксса кулпатирттан, 5 шинал стаж хIисавравун лавсун.
Ванал мукунма бувсунни пенсиярттал перерасчет дуллалишиву 2015 шинайн бияннин пенсияртту бивхьусса инсантуран. 2015 шиная шихунмай пенсияртту бивхьусса инсантуран пенсияртту бивхьуссар, цIусса пенсион формула хIисавравун ларсун, яла къулайми шартIру язи дургьуну.
Оьрмулул бугьара хьуну пенсияртту бивхьуминнан ва мушакъатшиву хIисавравун ларсун пенсияр­тту бивхьуминнан страховой взносру къадуллай бивкIсса чIумалсса перерасчетру дантIиссар пенсионертурал миннул хIакъираву буллусса аьрзирдайну.
Пенсиярттал перерасчет даврил хIакъиравусса аьрзри булун бюхъайссар электрон журалий паччахIлугърал порталданийхчIин.
И.Саидова