[dropcap]Г[/dropcap]ьарцаннан чIалай духьунссар Дибирдул арс АьвдурахIин Дибиров хъунама хIакинну зун увкIния мукьах Лакрал райондалул азарханалий хьусса ххуйчулийннайсса дахханашивуртту. Миннуя на навагу чивчуссия хьхьичIвагу, цайминналгу чивчунни. Лайкьсса буттал лайкьсса арс АьвдурахIин, вихьхьунгу, вил мусил каруннихьхьунгу Аллагьнал каши дулуннав Лаккуйсса жула агьалинал цIуллу-сагъшиврул ялув ацIан.

[dropcap]Б[/dropcap]игьа дакъасса хIакиннал даврицIун ванал бакIрайн ларсун дур жяматийсса давурттугу. Сакин дурну дур Гъази-Гъумучи цIу бу­ккан баврил цIаний зузисса фонд. Цил ца агьамсса мурадирттава­сса цану хьунни шагьрурдай ялапар хъанахъисса лакрал оьрчIан ла­кку маз, лакрал тарих, магьирлугъ ва аьдатру лахьхьин дуллан­сса лагерь Лаккуй зузи баву. Барчаллагьри хъунмасса ванайнгу, ванал чIарахбацIултрайнгу. Вайннал дуллалисса даврил чIарав бацIан пик­ри хьуна ттунмагу. ХхюцIалунния лирчусса шиннардий школалий зий бивкIсса на, дукIусса шинал давриягу лавгун, оьрчIах мякь бувккун буссияв. Хъинну гъирарай лагу-лавгссияв лагерьданий зун.
Цала ватандалул тарих, бу­ттахъал багьу-бизу, ниттил маз лахьхьин бувкIун бия Дагъус­ттаннал шагьрурдаягу, Москавлиягу, Донецкалиягу ва цаймигу кIанттурдаясса оьрчIру. На оьрчIан лахьхьин дав лакку мазрай «махIатталсса хIисавртту» дан, «ссихIирданул» (синааьрщарая) аьрщарая щютIуххив, ттук­ри, лелуххант бан, щавщилул мурхьирал къяртрая хъурзилтту дан. Гьарцаннал цащалла ларсъссар цалла дурсса затру, гайннущал – Лакку улклул кьанкьгу, барачатшивугу.
Лагерьданий бусса мутталий цаягу оьрчIал зумату къабавунни жугу бизар хъанай буру, шаппай нитти-буттачIан ччай буру тIисса махъ. Гьай-гьай, миннан асар хъанай диркIун тIий, лагерьданул директор ХIажиева Саидая тIайла хьуну, цинявппагу зузалтрал цахрасса аякьа ва ччаву.
Жу оьрчIащал лавгру Хьур­ттал шяравух сайрданий. МахIаттал хьуну бия гай, Николай паччахIнал аьралуннал ттупру ххал хьуну. Лавгру ттуршукурдал хьхьичIва бувсса мизитравун, ларгсса шинал Аьрасатнал Конституцион судья ХIадис ХIажиевлул бакьин бувсса. Гъирарай вичIи дирхьуну бия оьрчIру паччахIнал аьралуннал къалалул ва мизитрал тарихрая бусласийни. Бусарду ХIадис Аьбдуллаевичлуягу, га бунияла миллатрал пахрулун лайкьсса чув ушиву, зуягу, га кунма, лайкьсса инсантал букканнав куну.
Бусарду жула лакрал дянивгу чан бакъашиву жула лавгмунил ва хIакьинусса кьинилул пикри буллалисса инсантал. Мукунмину ттун чIалай бур АьвдурахIин Дибиров ва ванал пикрилул уртакьтал, ва лагерь тIигу-тIивтIуну, ванил даву бакIуйн дуккан дан чIарав бавцIусса Лакрал райондалул бакIчи Юсуп МахIаммадов, Дагъусттаннал Халкьуннал Мажлисрал депутатътал ЖахIпар Абуев ва Амирхан Амирханов, Лак­рал райондалул КIулшиву дулаврил управлениялул каялувчи Явсупи ХIамзаев, Аьрасатнал МВД-лул «Лакский» МО-лул каялувчи Юсуп Амиров, МЧС-рал отделданул каялувчи Басир МахIаммадов ва м.ц. ДакIнийхтуну барчаллагьрай бикIан аьркинссару жува вай инсантурайн. Хъунмасса умудгу бур вайннал пикрилул уртакьтал жула миллатрал дянив тачIаввагу чан къахьунссар тIисса.

Гуламан Исяева,
ш. ГьукIур