[dropcap]Т[/dropcap]ай архсса 1930-ку шиннардий щапI увкуну халкьунналгу дурцIусса Кьубиял шяраву дуккаврил оьрмулувусса биялсса оьрчIру-душругу бивкIссар. Аммарив ми занан­сса, ккалансса хасъсса учкъула къабивкIссар.

[dropcap]О[/dropcap]ьрчIру ккалай бивкIссар шяравусса лаякъат­рай. Ми шиннардий оьрчIан багьу-бизугу, элмугу лахьхьин дуллай, захIмат буллай бивкIссар ххуй-ххуйсса тарбиячитал. Миннавух бивкIссар: ЧIаратусса ИрвагьинхIажи, ХIанапи Даккаев, МахIаммад Ссамадов; КIундиятусса МухIаммада, Кьурван; Хъанариятусса МахIаммада Атаев; ТтурчIиятусса Асланбаг Шахмилов, МахIаммад Сулайманов; Ккурклиятусса Жабраил Жабраилов, Шагьумилаев, Сулайманов; Куматусса Аьвдурашид Оьмаров, Жалалуттин Оьмаров.
Вай бусравсса аьпабиву­хъал Кьубиял оьрчIан ва жямат­ран элмулийнсса ва маэшат-культуралул чулухунмайсса ххуллу хъиннува аьч бувссар. Ахирданийгу жяматраву гьаз хьу­ссар, оьрчIру шяравух ппив-ххив хьуну къабучIирча, вай дуклаки бансса цIусса , хасъсса учкъула бан аьркинни тIисса аваза. Шяравату ябувцсса КьахIатталлил даралувусса кьалагрулий, аьшгу щуну, 1930-ку шинал, ччя­сса интнил чIумал байбивхьу­ссар гьану бизлай. Ххяллавалу ва БакIул-МачI тIисса чуллая ттукрай ххилан бивкIссар чару. ТIалав був­ссар Яру­ссаннал ТIилитIи шярава 4 чарил усттар. Миннан­сса пяп-чарилсса буллай, пагьлаталну зий бивкIссар шяраваллил жагьи-жугьулт. ХIасил, сентябрьданул 1-ннийнин хъунисса , лахъсса чIавахьулттащалсса чаннасса учкъула ччаннай бацIан бувссар цуппагу ща бивхьуну цIувцIу-чарттая бувсса. Мунийнгу тIун бивкIссар «Хъун-Учкъула» тIий.
Зун бивкIссар Хъун учкъула 2 сменалий. Ваца къала кунма, му ххал хъанайгу бивкIссар Анжи-Щурагьа нанинан КIибачIай ххуллия кIялава-кIялану. Хьхьувайгу чIалай бивкIссар пперха тIутIисса чирахъирттайну.
1970 шиннардий тIурча, оьрчIру гьарза хъанай, Хъун-Учкъула гьа къахъанай, Къурнил даралуву, хъунмурчIин колхозрал арцуцIух, бувссар хъунмасса типовой учкъула , ца сменалий зузисса. КIайва гьантрай Хъун-Учкъулагу кIура баен був­ссар Культуралул къатлуйн.
Ца шанна шинал хьхьичI, ссайну хьуссариввагу кIул къавхьуна, хьхьуниву цIу дагьну ччувччуссар кIа эмаратрал къатта-чIалъаь. Ниттихъал, бу­ттахъал гьухъ хьхьирцIуну бувну бивкIсса,тарихрал гьайкалну ябан аьркинну бивкIсса учкъулданул бакIрачIан бувкIмунил савав хIакьинугу кIулну да­къассар.
Уттигъанну кIа Культуралул къатлул хъунаману зузи­сса АхIмадов МахIаммад хьунаавкьуну, цIухху-бусу буллай уссияв кIанил хIакъираву. «Шяраваллил администрациялул кулпатрайхчин, навагу хIала увххун, магъулсса буллай, цIуницIакул щаллу бавай буру. -Амма, шяраваллил жагьи-жугьулт, му ссан аьркинссар, мивун цу занантIиссар тIий, чIарах бувккун лагай», — тIий, хъювсулну буслай ия МахIаммад.
Му зат савав къавхьуссания, на ва макьалагу, къачичинссия.
Жула бусравсса «Илчи» кказитрайн на ттинингу мадарасса затру чивчусса инсан ура. Ми бакъассагу, кIива жуж итабакьав на ттула бюхъулухгу урувгун, кIа ттула буттал шяраваллил тарихраясса. Аммарив, цала буттал шяраваллил хIакьинусса багьу-бизулухгу, лархьхьусса кьинилухгу баччибакъа буруглачисса къучитурансса жавабрал махърур вай ттул махъру.
Зул нитти-буттахъал гьу­хъай ва оьттуй бакъари чивчуну бусса Кьубиял тарих. Миннал бакъаривкьай Муллулаллил чулданийсса 200-хъул оьллан­сса хъуни чIаланнащалсса ппаллу ва зузалтрансса къатри дурну диркIсса? Миннал бакъаривкьай Кьуллалий 50 гъайтIи ницансса цIувцIу-чарил ппаллу бувну бивкIсса? Оьллан накI чIяру дан миннал дакъаривкьай урттил лухччиний – ЧIахIлуву, Буч-Мурлулу, Аьнхъразанний, Ккуркки-БакIулу оьллансса ва бюрчурдинсса хъуни хъюрду дурну диркIсса? Миннал дакъаривкьай Зурузаинтталу ва ЩяйтIан-Мащилий яттин­сса мащив ва гураннугу, ми­ккува хIухчалтрансса къатригу дурну диркIсса, ттуку-чу къалагайсса ратI-ккутIавухгу тIантту ва бургъурдивгу ххюрхху бувну занай?
КIулссаривкьай зун, 1947 шинал Хъуннеххай электростанция байни, гьанурдугу цала бихлай, неххал хъуни виххуччивгу кувннал кувннай дихьлай, 3 км. манзилданий ттурцIардинсса ккутIругу дурккун диркIшиву? Зун кIул банна райондалий цалчин Лениннул ордендалун лайкь хьусса доярка жула шяравасса Щапарщахъая ПатIима бивкIшиву.
Цал 1934 шинал Руарив, яла 1970 шиннардий Шаларив бувсса багъругу зул бавахъал захIматри.
КIа Руаривсса багърал ахъул­ссаннул ва ахънилсриннул ябув­ссар дяъвилул шиннардий ккашилсса Кьубиял мюрщи-хъуни. ХIакьину заллу-зал акъа ливчIун бунугу, 82 шинай ягухьуну, ахъул­сса ласлайнмари бусса Руарний багъгу. ХIайп тIийна икIара, кIа багъраву багъманчишиву дуллай, зий ивкIсса Аьвдуллагьихъал АхIмадигу, багъраву зий бивкIсса 12 хъуни хъамигу. ХIайп чинсса бакъа ба­къар мува куццуй Шаларив 50 гектар дусса ххаллилсса багъ бувсса Шагьидал МухIаммадгу, гикку зий бивкIсса комсомол душаврал звеногу, ттоннарду ахъул­ссаннул датIлай, дагъусттаннал личIи-личIисса консерварду дай заводирттайн диян дуллай, колхозрал экономика гьаз дуллай, агьалинал маэшат ххуй буллай бивкIсса.
Цал уттигу кIура авну, дакI­нийн бутан ччай ура, Культуралул къатлуву зий бивкIсса зузалт: Важид Дацихъай, Аьбид, Аминат, МаулхIаят. КIа къатлул бакъаривкьай Бархъаллал Уручуллал, ЧукIуннал, Ккурккуллал, ГьунчIукьатIрал, КIундиннал, ЧIарттал щархъавун бахьттагу занай, пьесарду, концертру ккаккан дуллай, агьали тяхъа буллай бивкIсса? КIа къатлул гьурттучитурал бакъаявкьай, мира шиннардий ВицIхъиял махIлалий 1-мур кIанугу бувгьуну, Гъумукгу мува кIану бувгьуну, МахIачкъалалийнгу гьан бувну бивкIсса?
Ттун, оьрмулул 90-хъул шиннайн ивсса кьубиричунан, нара кIицI ларгсса сайки кIай циняв давурттавухгу канийнугу, му­къуйнугу хIала-гьурттуну ивкIсса инсаннан, бигьану къабикIай жула бутта­хъая тIутIимур, баллалимур лялиян буллан. Мунияту гьуз увкура, чичин ва макьалагу.
Шяраваллил администрациялухь тавакъюгу буллай ура, кIа жула шяравусса кIивагу мизит кунма, Хъун-Учкъулалул къат­ригу жула буттахъал ирсирал гьайкалну, зула кIунттихьхьунгу лавсун, ябуллай битияра тIий.
Оьмахан,
ш. Хъун-Кьуби