[dropcap]Р[/dropcap]еспубликалул захIматрал ва социал развитиялул иширттал­сса буллалисса министр Расул Ибрагьимовлул Барчаллагьрал чагъар буллунни 1-мур ЦIувкIратусса, МахIачкъалалив яхъанахъисса, Дагъусттаннал медициналул университетрал 4-мур курсирай дуклакисса РахIима Дукиеван.

ПатIимат Рамазанова
Ва дуккавриву итххявхсса, хьхьичIун бурувгсса, ас- намус бусса душ бур. Ванин 10 шин хьусса чIумал, машиналий апатI хьуну, лавгссия дунияллия ппу Аьбдул – ххишала акъа дакI хъинсса, халкьуннан ххира­сса жагьил. РахIимангу буттаяту ва ниттияту ирсирай дирхьун­ссар дакI хъиншиву, инсантуран кумаг буван чялишсса бушиву. Каникуллайн буккайхту, вайми студентътал кунма, бигьалаган кIанттай, РахIима бугьараминнансса ва мушакъатминнансса «Ветеран» интернатрал персоналданун кумаг буллай бивкIун бур. КIицI лавгсса идаралул хъунаманачIан бувкIун, ванил бувсун бур цуппа интернатрал зузалтран кумаг буллан хIадурну бушиву. Персонал отпускирттайн лагайсса гъинтнил чIунгу дунавхьур, хъунама Мажид Мирзаевлулгу барчаллагьрай кьамул бувну бур РахIима. Интернатраву ванил аякьалия, дакI цIуцIаврийсса кумаграя рязину, РахIима итабакьинмагу ччай къабивкIун бур. Социал сетирдай, инстаграмрай ва иширая бувккусса министр Расул Ибрагьимовлун, душнийн цачIанма оьвкуну, барчаллагь учин ччан бивкIун бур. «На дакIнийхтуну барчаллагьрай ура, бугьарасса инсантураха ххуйсса аякьа дуваврихлу. Вияту эбрат ларсун, цайми жагьилталгу кIункIу хьунссар тIий ура бугьарасса инсантуран кумаг буллан, ми жулла аякьалух, нахIусса мукъух мякьну бикIайссагу бухьукун», — увкунни министрнал. «Интернатрая арх бакъа яхъанай буну, ттун мудангу ккаккайва дунияллул чIярусса тирхханнурдая махIрумсса бугьарасса инсантал. На мудангу миннахь яхши-хаш байссия, дакIниймур ласайссия. Каникуллу дайдишайхту, миннан кумаг буллансса хIукму бувссия. Щукрулий бура, ттущара миннал щавурдай хъат дишин, ми ца­хъис бунугу ххари-шад буван хьуну бухьурча», — увкунни РахIимал. ЛяличIисса хIурмат ва сий дур РахIимал медициналул университетрал студентътурал ва преподавательтурал дянивгу.
ХIакьину хIакинтурай аьйрду дуллай бур, инсантураха дагьайкунсса аякьа дуллай ба­къар, арцулсса, харжирдалсса булларча бакъа, къашайшалтрал балаллий бакъар ми, тIий. Бухьунссар хIакинтурал кьюкьравугу мукунсса. Гьар аралуву къачанниха пишалул уртакьтурай ттангъа дуванну зузимигу. Амма РахIима кунма зузиминнал адаврай ядувантIиссар кIяла хялатирттавусса инсантурал марцIсса цIа.
Ттулва ххаллилсса шяравудушнин чIа тIий бура уттиния тинмайгу дуккавриву ва дуллалимуниву тIайлабацIу!