«Лакрал райондалул жагьилтал экстремизмалийн ва терроризмалийн къаршину» тIисса акциялул лагрулий Щардал шяраву хьунни экстремистурал каруннища ливтIусса райондалул полицанал зузалтрал аьпалун хас дурсса футболданул турнир. Турнирданул ца мурадну сакиншинначитал ккаклай бур шагьрурдай ялапар хъанахъисса райондалул жагьилтал цачIунмай баву, миннал дянив дусшиву цIакь даву.

Зулайхат Тахакьаева
Турнирданий гьуртту хьу­н­ни 12 команда: Шардал — 3 команда; Ххюлуссуннал, ЧIурттащиял, Хъурхърал, Гъумучиял — 2 команда (Хъун-Мизитрал ), ГьунчIукьатIрал, Хьурттал, ЦIуссаккуллал ва ЦIуссачIурттащиял.
Финалданийн дурккуна Гъумучиял ва Щардал -3-мур команда. Вайннал тIуркIулух буруган бувкIун бия райондалул бакI дургьуми ва идарар­ттал каялувчитал. ТIуркIу унгу-унгусса хьуна. Занази кубок лавсунни Гъумучиял командалул. КIилчинмур кIану бувгьунни Щардал 3-мур командалул. Шамилчинмур кIану бувгьунни ларгсса шинал «Лига Лакии» футболданул турнирданий ххув хьусса ЦIуссачIурттащиял командалул.
«Яла ххуйма тIуркIутIала» тIисса цIанин лайкь хьунни МахIмудов ХIажимурад, Гъумук лачIунбуккаврил тренерну зузи­сса яручу (Гъумучиял команда), «Яла ххуйма къапучи» — Маммаев Надиршагь (ЦIуссачIурттащиял команда), «Яла ххуйма гьужумчи» ва «бомбардир» хьунни Гъумучиял командалувасса Сулайманов Аьвдулжалил.
Ххув хьуми барча буллай, райондалул администрациялул бакIчинал хъиривчу Абакар Къюннуевлул кIицI лавгуна турнир ларайсса низамрай хьушиву. Турнир райондалул жагьилтал наркоманиялийн ва экст­ремизмалийн къаршисса акция хIисаврай даврилгу жагьилтал цIуллусса оьрмулухлу бушиву бусласиссар, — увкуна ванал.
Шиная шинайн хъунна хъанай дур турнирданул сий, чIяву хъанай бур муний гьуртту хьун ва тамашалийн букIлакIими.