[dropcap]А[/dropcap]вгуст зурул 15-нний МахIачкъалаллал зума-къирагърай хьунни хъуннасса ДТП – машина щуну, оьрмулуцIа хьунни шанма оьрчIал нину. БакIрай ва ДТП-лул тахсиркарну ккаккан уллай уссия МахIачкъалаллал Кировуллал райондалул администрациялул бакIчинал хъиривчу Базанов Арсен.
И. Саидова
Хъирив лавну махъ МВД-лул ва информация къатIайласса душиву тасттикь бунни. ДТП цурдагу хьуну дур Каммаевлул цIанийсса кIичIираву, Сулакь пострая арх бакъасса кIанттай. Цимурца хьусса куц ккаккан буллай бур авария хьусса кIанттуцIух бивхьусса камералул. Видеолий чIалай бур, Toyota Camry машина хьхьичIун ливчуну, ххуллул мурцIний бавцIусса хъамитайпалийнгу щуну, бордюрданийн лавхъсса куц. АпатI хьусса хъамитайпа анавар кумаграл машина бучIаннин бусса кIанайва къуртал хьуну бур.
ДТП хьусса кIанттуя, апатI хьусса инсангу кьаивтун, машиналул шофер ливхъун ур. Полициялул зузалтраща анаварсса мутталий лякъин бювхъуну бур тахсир хьусса шофер.
Мува ппурттуву дурккун дур авария дурсса шофер Базанов Арсен увгьуну ур тIисса информациягу. Дагъусттаннал МВД-лул ва информация къалпсса душиву тасттикь буллай бур. Хъиривлаявурттайн бувну, му иширал тахсикарну ур 34 шинавусса Руслан. Полициялул цалсса тахсиркарнал фамилия буслай бакъар. Ва иширал ялув дуллай бур хъиривлаявуртту.
