Август зурул кIилчинмур алхIаткьини Строительнал кьинир. Ва байран дувай, Аьрасатнаву бакъагу, СССР –данувун духлай диркIсса республикарттайгу. Ва жул кказит мудангу тIалав бувайсса ва чIарав ацIайсса дуснал, Дагъусттаннал лайкь хьусса строительнал, Шагьабуттиннул арс ХIажикьурбанов Сайдуннулгу байранни.

ПатIимат Рамазанова
ЦIуссаккулув увсса ва хъуна хьусса Сайдун цува 1-мур ЦIувкIратуссар. Гьашинумур байран Сайдуннун ляличIиссар, строительнал даврий зий ванал 40 шин хъанай дуну тIий. 1977 шинал Да­гъусттаннал политехнический институтраву инженер — строитель шайсса факультет къуртал бувайхту, Сайдун зун тIайла увккун ур Аьшттарханнайн «Каспрыба» трестрайн. КIира шин микку зий дурну дур. Яла Хасавюртлив агьали яхъанансса къатри, школарду ва оьрчIансса садикру буллалисса СМУ-5 –лий зий ивкIун ур 1992 шинайннин. Шанна шинай зий ивкIун ур Германиянаву совет аьралуннал къатралсса буллалисса управлениялул хъунаману. 1992 шиная 2003 шинайн ияннин Хасавюртливсса «Ремстрой» тIисса компаниялий каялушиву дуллай ивкIун ур. 2003 шинал МахIачкъалалив тIалав увну ур, хIакьинусса кьини зий ур АСД (архитектура, строительство, дизайн) тIисса компаниялул мурадру бартбигьай директорну. МукьцIалла шинал мутталий хьун дурсса Сайдуннул бю­хъулул ва хIарачатрал ахъулссаннул хIасиллугу оьккисса да­къар: агьали яхъанансса 35 къатри дурну дур, мукунма 5 школа ва 4 оьрчIансса ясли-садру бувну бур.
МахIачкъалалив хIат-хIисав дакъа дуллалисса къатрал тема су­кку дурну, на ванахь цIухлай бура, тIайлассарив, цIуну дуллалисса чIяруми къатри строительствалул технология дагьайкун къадурурччуну дуллай бур ва вари чин­сса ялувбацIавугу дакъар тIутIаву тIий. «Совет заманнай бюхъайва строительствалул ялувбацIаву ххишаласса ва цIакьсса дикIан, амма цIанакул хъиннура цIакьну дуллай буссар къатри, гьанурдугу, чIирттугу металлоконструкциярдайну цIакь дуллай, монолитсса журалул каркасру буллай. Рязира къатри дуллалисса фирмардал хъунмур мурад бюхъайссаксса чIярусса арцу лякъаву, дурну къат­ригу, инсантал мивун бакьаву бушиврий, учиннуча, хIаят дакьин даву, архитектуралул чIалачIин, диц-куц исвагьи даву мурадрай­сса давурттив дуллай бакъашиврий. ХьхьичIва, цIусса къат­ри дуркун, чара бакъа хIаятраву спортрал майдан, оьрчIан дялахърулунсса кIанттурду, агьалинансса къулайшиннарду дуваву ххишаласса дикIайссия. Къат­ри кьамулгу къадувайссия мукунсса давурттив къадурну. На уттигу гендиректортурахь икIара, дурну къатри чулийн дуккайхту, нанияра хIаятравугу укун­сса даву дуванну, оьрчIру тIуркIу тIунсса кIану буванну тIий. Амма миннан ччан къабикIай мукунми давурттан къуруш харж дуван. Царай къатри дурну къуртал дувайхту, цайми дайдишин чялишну бикIай,коммерциялулми ма­съалартту хьхьичIунну. ЦIанакул уква къатри дуллай бур анжагъ аьра­лийтуран. Мушакъатсса, ятин­сса, чIявусса оьрчIру бусса кулпатру бур ялув магъи та хьувив къакIулсса. Ва кIанугу хIисавравун лавсун, къатри дуллалисса идарар_ттая тIалавшинна дикIан аьркинни 15-20 % квартирардалвагу уква буллан. Масалдаран, 100 квартира бусса къатри дувайхту, 15-20 квартира хIукуматрайн тапшур буван аьркинни- мюхтажминнан уква булун», — тIий ур Сайдун.
Сайдун Шагьабуттинович, жу дакIнихтуну барча дуллай буру вилгу, вищал архIал цинявппагу да­гъусттаннал строительтурал профессионал байран! Барча дуллай буру му даврий зий хъанахъисса вил 40 шинал юбилейгу! ЧIярусса шиннардий агьали ххари буллан­сса къатригу, цайми давурттивгу дуллансса цIуллушиву дулуннав вихьхьун!