Аьмсса тарихрал ва кьадарданул гьайкал

Июльданул 15-нний Дагъусттан Республикалул БакIчи Рамазан АьбдуллатIипов ивунни УнцIукIуллал райондалийсса культуралул ва тарихрал «АхIулго» комплексрайн. Мунащал архIал миккун бувкIун бия ДР-лул культуралул министр Зарема Буттаева ва УнцIукIуллал райондалул бакIчи Ися НурмахIаммадов.

— Жува буварду аьмсса аьпалул, аьмсса кьадарданул мемориал. Ва объект буллай сайки щалва Дагъусттан буссия. Зунма чIалачIисса куццуй, дурмур лавайсса даражалийсса хьунни. АхIулго – щалагу Аьрасатнал культуралул ва тарихрал гьайкалли. Жущава шайсса цимурца жу буварду, уттирив аьркинни ва гьайкал дуруччин ва махъа нанисса никирал кIулшилийн ванил мяъна тIайлану диян дуван. Чара бакъа аьркинссар щалагу Дагъусттаннаясса дуклаки оьрчIан шиккунсса экскурсияртту буллан, хаснува цIана, гъинтнил каникуллу дусса чIумал.
Му бакъассагу, дуруччин аьркинссар комплексрал лагма-ялттусса марцIшиву, сакин дуван аьркинссар шиккун букIлакIисса инсантурал рахIатшиврун чара бакъа аьркинсса шартIру, цимурца лавайсса даражалий дикIан аьркинссар. БувчIин аьркинни, шикку жура хъамаллуран Дагъусттаннал ва Аьрасатнал лажин ккаккан дуллалишиву.
Ва хъанахъиссар пропаганда дуллалисса объект, цилгу чIалачIи буллалисса Дагъусттаннайсса инсантал цIанасса чIумуха лавхьхьуну ялапар хъанай бушиву, мунищала архIал цалва тарихгу дакIнийну ва мунил хIурматгу буну. Шикку дагъусттанлувтурал ва оьруснал цалва оьттуйну рувхIанийсса нур диян дурссар жула ва Аьрасатнал аьмсса кьадарданийн. Тарихрал ва журалул дарсругу чара бакъа инсантурачIан диян дуллан аьркинссар. Расул ХIамзатов чичлай ивкIсса куццуй:

Под непрерывный грохот барабана
В угаре рукопашкой кутерьмы
Перемешалась кровушка Ивана
С такой же точно кровью Магомы, — увкунни Республикалул БакIчинал.
ХIурмат бусса хъамаллуран куну байбивхьусса луттирай ахирданий мунал чичругу дунни.

Бадрижамал Аьлиева