МахIачкъалалив азарунния ливчусса инсантал бувккунни оьрчIру лиян баврийн къаршину дуллалисса акциялий гьуртту хьун. Миннал хьхьичI ихтилат буллай, Дагъусттан Республикалул ЦIуллу-сагъшиву дуруччаврил министерствалул оьрчIал ва ниттихъал цIуллу-сагъшиву дуруччаврил отделданул начальник Раиса Шахсиновал увкунни:
— Шиная шинайн Дагъусттаннай оьрчIру лиян бувсса ишру чан хъанай бур, масалдаран, 2015 шинал мукунсса 7703 иш бивкIхьурча, 2016 шинал 7274 иш хьуну бур.

Жулла республикалий оьрчIру лиян буллалаву 8,6 процентрая дагьну дур 8,5 процентрайн оьрчIру бувайсса оьрмулувусса 1000 хъамитайпа хIисавну, Аьрасатнаву тIурча, му процент бур 22,8. Щаллагу дунияллий ва Аьрасатнаву хъами оьрмурдава лавгсса иширттансса сававрттаву абортру дур 2-мур кIанттай. Ялагу, оьрчI къахъанахъавринсса багьанагу чIявумур чIумал аборт давриву бикIай, — увкунни ванил.
Ихтилат мукунма бунни ОьрчIал ихтиярду дуруччаврил Дагъусттаннайсса Уполномоченный Мария Ежовал.
Оьруснал театрданул хьхьичIсса майданнив Дагъусттаннал балайчитурал ккаккан дунни концерт, мунийну цивппагу абортирттайн къаршишиву чIалачIи буллай.
Ва майданналийва акушертал-гинекологтал консультацияртту дуллай бия, кулпатрайн ва хъамитайпалул цIуллу-сагъшиврийн багьайсса суаллахьхьун жавабру дуллай.
Щалагу Аьрасатнал «Пишкаш бува ттун оьрму» тIисса акция жулла республикалий бувну бур ЦIуллу-сагъшиву дуруччаврил министерствалул. Му байбивхьуну бур цIуну тIивтIусса Перинатал цетрдания.
Щалвагу билаятрай ва акция буллай бур 2008 шиная шинмай, Светлана Медведевал Социал ва культуралул сиптардал фондрал сипталийн бувну. Мунил агьаммур мурадгу бур абортру хьун къаритаврийн тIайла дурсса, кулпат, кулпатрал аьдатру цIакь даврийн, дунияллийн буккан бувасса оьрчIал оьрмурду ва хъаннил цIуллу-сагъшиву дуруччаврил ххуллий паччахIлугърал структурарттал, жяматийсса ва диндалул организациярттал, личIи-личIисса сакиншиннардил гужру цачIун баврийн тIайла дурсса программа щаллу даву.

Бадрижамал Аьлиева