Июль зурул 7-нний Казбековуллал райондалий Ленинаул шяраву яруссаннал ва чачаннал агьулданул дянив чIири-хъунсса къалмакъал хьунни.
Ва цалчинсса къалмакъал дакъар Ленинаул шяраву хъанахъисса. Июнь зурул 25-ннийгу, кIия жагьилнал дянивсса рагьаву сававну, шикку чIявусса инсантал хIала бувхсса аьлагъужа хьуссия. Та чIумал 12 инсаннан цIунцIияртту хьуссия, миннавух — шама полициялул зузалангу. ДР-лул МВД-лул бусласимунийн бувну, къалмакъал хьуну махъ бувгьуну бивкIун бур 10 инсан, миннава ряха инсаннай тахсир ккавккун бур.
— Та чIумал къалмакъалчитал паракьат бувну бивкIнугу, та иш ишла буллай бур бунни райондалийсса ва региондалийсса тагьар оьлукъин дан, миллатирттал дянив дичин ччиминнал.
Соцсетирдаву ми оьвтIун бивкIунни, республикалийссагу, Чачаннавуссагу чачаннайн Ленинаул шяравун батIияра тIий. Тагьар хъиннура оьлукъин къаритан шяравун бувкIунни Чачаннал республикалул каялувчинал вакилтал. Миннал оьвчаву дунни шяравун бавтIсса инсантурайн, хаснува Чачаннава бувкIминнайн, чIаххуврайсса республикалул иширттавух хIала мабуххару куну, бувчIин бунни гьаз хьусса масъалартту, маслихIат ккавккун, бавкьуну щаллу бан хьунтIишиву.
ЦIуссалакрал райондалий ялапар хъанахъисса лак цIусса миналийн бизан баврил ва Аухуллал район цIу дуккан даврил масъала мудангу буссар республикалул каялувчитурал къулагъасралу. Ва даву дузрайн дуккан дан федерал центрданул чулуха арцуйнусса кумаг аьркин багьлагьаву бакъассагу, аьркинну бур щаллу бан бигьа бакъасса хозяйстволул ва административ масъаларттугу. БувчIин аьркинссар ва цукунчIав миллатру сававсса иш бакъашиву. Укунсса тагьарданий, миллатирттал дянив къадичлай, ссавурданий сукку тIун аьркинссар, — увкунни ва иширал хIакъираву Дагъусттаннал миллатрал политикалул министерстволул.