БакIрал ня ххал дигьлансса аппарат

Дагъусттан Республикалул ХIукуматрал Председатель Аьбдуссамад ХIамидов вай гьантрай ивунни Республикалул клиникалул азарханалул базалий буллалисса Лучевой терапиялул центрданул къатри ссайн бивну бурив, ци даражалий бурив ккаккан.

Мунащал аьрххилий бивзунни Дагъусттаннал цIуллу-сагъшиву дуруччаврил министр Танка Ибрагьимов ва «Республикалул клиникалул азархана» ГБУ-лул хъунама хIакин Ибрагьим МахIаммадов.
Центр буллай байбивхьуну бур июнь зуруй. Уттинин дурсса даврил хIасиллу дуллай, Аьбдуссамад ХIамидовлул кIицI лавгунни микку бикIантIишиву «Гамма-нож» аппаратрансса хасъсса къатри. Му аппарат буккан бувну бур личIи-личIисса патологиярттал сакиншиннардил (образования) аьщуйн щусса (сверхточное) облучения дуваншиврул. ЦIанасса ппурттуву Аьрасатнаву мукунсса 5 аппарат бусса бур.
— Рамазан АьбдуллатIиповлул хIарачатрайн бувну лякъин бювхъунни «Гамма-нож» аппаратрахсса харж бишинсса инвестортал. Му аппаратрансса харжлугъ (4 миллиард къурушрал) цайнна ласлай бур миннал. Анжагъ центрданул къатри баншиврулсса арцур республикалулмур бюджетрава харж хьунтIисса, — бувсунни Аь. ХIамидовлул.
Республикалул премьер-министрнал мукунма кIицI лавгунни
вай къатри октябрь зурул ахирданийнин бувну къуртал бансса пикри бушиву, центр цуппа тIурча, 2018 шинал инттухунмай тIитIинсса ният душиву.
— Къатри буллай байбишиннин хасъсса пишакартурал шикку дурссар экспертиза, проектралсса бувссар Москавуллал ца фирмалул. Шиккува кIицI лаган, укунсса давуртту дуллансса лицензия Аьрасатнаву бувагу кIива фирмалухьри бусса. Проектрал ва сметалул документация ларсун махъ дайдирхьуссар давуртту. Шикку бикIантIиссар 1400 квадратный метра бусса къатри. Уттизаманнул оборудованиялул, кьай-кьуйлул щаллу бувсса ва центрданий бюхъантIиссар онкологиялул азарду дусса Аьрасатнал Кьиблалиясса къашайшалт кьамул буллан, — увкунни ванал.
Танка Ибрагьимовлул бувсунни «Гамма-нож» аппарат ккаккан бувну бушиву 10 миллион инсаннан кумаг буван.
— Аппарат тIалав бувссар ва му бувайссар хасъсса заказрайн бувну. «Гамма-чIила» аппарат буван 7 барз лагайссар. Му аппаратрайн бувну дуллалисса хъин баврил ляличIишиву мури – бакIрал нярал яла захIматну бияйсса кIанттурдайн тIинтту (лучи) диян даву, мунийну гамма-тIинттал ччуччин дуллалиссар ва чIири личIан дуллалиссар цIуну хьусса дикI (новообразования). Мукун, операция къабувнува, щаллу хьун бюхълантIиссар. ЦIусса центрданий мукунма бикIантIиссар лаборатория, МРТ, томограф. Диагностика лавайсса даражалий щаллу дуллантIиссар. Центр тIитIлатIисса кьини шиккун чил хIукуматраясса пишакар учIантIиссар, мунал жулва шийхвасса пишакартуран ккаккан бувантIиссар цIусса аппаратращал цукун зун аьркинссарив, — увкунни Танка Ибрагьимовлул.
Цалва ихтилатраву Ибрагьим МахIаммадовлул кIицI лавгунни ва проект щаллу даврил ца агьамсса бутIану хъанай бушиву центрданий зунсса лавайсса даражалул пишакартал хIадур баву. Центрданийн тIалавну бусса бур дунияллул даражалийсса медициналул физиктал ва лучевой терапевтътал, чара бакъа аьркинну усса ур 50 пишакар.

Бадрижамал Аьлиева