Июль зурул 25-нний ДР-лул Миллатирттал политикалул министерствалий хьунни Дагъусттаннал ва Ставрапольллал СМИ-рдал вакилтурал хьунабаву.
Шиккусса ихтилат бия «Коммуникация» «власть-СМИ-общество» интернетрал ва цифровой технологиялул чялишсса шартIирдай темалун хас бувсса.
Пресс-конференциялий гьуртту хьунни ДР-лул ва Администрациялул БакIчинал Информациялул политикалул управленилул хъунмур Тамара Чиненная, Республикалул информациялул ва печатьрал министр Рашид Акавов, СКФО СМИ-лул ассоциациялул председатель, «Портал Северного Кавказа» изданиялул хъунама редактор Вадим Баканов «Дагестан РИА-лул директор МахIаммад МахIаммадов, ДР-лул Журналистурал союзрал председатель Аьли Камалов ва Дагъусттаннал ва Ставрапольллал СМИ-рдал вакилтал.
Хьунабакьаврий рязисса журналистътал бия кувннал кувннахьхьун жура-журасса темардаясса суаллу буллай, къакIулмур цIухлай. Шикку гьаз бувсса цинявппагу масъаларттал хIакъираву ккавккунни хасъсса маслихIатру.
Республикалул информациялул ва печатьрал министр Рашид Акавовлул балжину бувсунни ведомствалий дуллалисса агьамсса давурттая. Ванал цала ихтилатраву кIицI лавгуна соцсетирдаву ва интернетраву тIааьн бакъасса, инсантал гьалак буккан буллалисса информацияртту гьан къабитаврил ялув бавцIуну бушиву.
Вадим Бакановлул кIицI лавгунни, соцсетирдал ва СМИ-лул ихтиярду ва миннаясса жаваблувшинна цакуццуйсса дикIан аьркиншиву.
— Агана инсан тIитIлай ухьурча СМИ, му цачIун буллай ур аьркинсса документру, дуллай ур налогру, арендалий ласлай ур ми зузи дансса къатри, буллай ур зузалтран харж. Цимивагу ацIазарахъул инсантал подписчиктал бусса, миллионну интернет сообществардал ми цичIар дуллай бакъар. Миннал авторталгу, цала шаппагу щябивкIун, аккаунтирдай каялувшиву дуллай бур. Рекламартту тIурча миннал ришлай бур цала страницардай, мунихсса арцугу банкирал карталийн дичин буллай.
Цанни миннай закондалул ххуллийсса жаваблувшинна дакъасса? — кунни В. Бакановлул.
Хьунабакьаврий гьуртту хьуминнал вай масъалартту хIисавравун лавсунни. Рашид Акавовлул кIицI лавгунни ва масъалалул хIакъиравусса жула пикрирду бусан хасъсса ведомствардайн буккан аьркиншиву.
Журналистурал мукунма ххал бивгьунни интернет-СМИ-лул хIакъиравусса цаппара цаймигу масъалартту.
И. Саидова
