Роспотребнадзорданул Да­гъусттаннайсса Управлениялул пишакартурал ишбажаранчитуран, дуки-хIачIиялуха зузиминнан «тIиртIу нузкьунттив» тIисса батIаву сакин дурунни.

З. АьбдурахIманова
Управлениялул регистрация дувайсса ва лицензия дулайсса отделданул хъунмур Наида Къапиевал ишбажаранчитурал чIявуну къулагъас къадувайсса гъалатIирттах къулагъас дурунни.
Н. Къапиевал чIурчIав дурунни гьарцагу ишбажаранчинал канихь дикIан аьркиншиву цачIарасса продукциялул иш-тагьар цукунсса дуссарив бусласисса, лабораториялул ххал диргьусса, хъирив лавсса программа. Му программалийн бувну миннаща цащава бюхъантIиссар цала предприятиярттай ишла дуллалисса, итадакьлакьисса продукциялул хъирив бацIан. «Балики, миннан цанма ччай бухьурча цала продукциялул бактериологиялул хIакъиравусса хъиривлаявуртту дуван, миннахь дикIан аьркин­ссар лабораториялул производство щурущи дан ихтияр ласласисса лицензия»,- увкунни ванил.
Н.Къапиевал ххи бувунни гьарцагу пишакарнал канихьсса медициналул жуж Роспотребнадзорданул, Гигиеналул ва эпидемиологиялул центрданул чулухасса цалчинна-цалчинсса тIалавшиндаран ккаллишиву. Мукунма ванил бувсунни организациярттайсса, предприятиярттай­сса пишакартал медициналул чулуха ххал бигьаврил масъала щалава багьайшиву миннул каялувчитурайн, заллухъруннайн.
«Ккуркки столданухсса» ишбажаранчитурал чулухагу Управлениялул пишакартурахьхьунсса суаллу чансса бакъая. ЦIухлай бия медициналул ххал бигьаву цуксса чIумул дя-дянийх даван аьркин_ссар тIий, му дувайсса хIакинтурал ва дуван ихтияр дуллалисса лицензияртту дусса поликлиникарттал сияхIру.
Цала чулухагу барчаллагьрай бия Роспотребнадзорданул чIа-чIаннин цанна мюнпатсса укунсса батIавуртту дуллалаврихлу.
Бизнес дачин дуван кумаг­рансса укунсса школарду тIивтIуну махъ ттинин республикалул ттуршахъул ишбажаранчинаща бювхъуссар цанна аьркинсса информация ларсун, цалла давриву му ишла дуван. Укунсса батIаврий гьуртту хьун ччинаща бюхъайссар, 69-01-17 телефондалийн оьвкуну, зула цIарду чичин.