Тимурдул арс Къаллаев Багьауттин

Июньдалул 23-нний хар-хавар бакъасса бивкIулул зевххунни жущава Карашрал цIанихсса Къаллахъал тухумраясса Тимурдул арс Багьауттин.
Багьауттин увну ур Лакрал райондалий Гъумучиял шяраву 1992-ку шинал июльданул 2-нний. 2010-ку шинал 11 класс бувккуну, увххун ур колледжравун, хъирив – Дагъусттаннал халкьуннал хозяйствалул университетравун. Багьауттиннун дазу-зума дакъа ххирая уссур-ссу, гьалмахтал, чIахху-чIарахми. Ванал дия щилчIав дакъачIинсса гьартасса, тIиртIусса дакI, аьчух­сса хасият.
Ванияр шиннардил хьхьичI, оьрмулул 46 шинаву, 3 мюрщи­сса оьрчIгу махъ кьабивтун, ялату лавгссар щала щарнин ххирасса, бусравсса Тимур – Багьауттиннул ппу. Утти ва балагу бивунни кулпатрал ялун. Ххишала бакъа захIматри нязаннив­сса бивкIу лялиян бан ниттингу, уссурссуннангу.
Багьауттиннун ххишала бакъа ххирая футбол. ЛяличIинура ххирая Петербургуллал команда «Зенит». Ва хъинну ххари шайва цалла команда ххув хьувкун, командалувун ххуйсса футболист, тренер увкIукун. Ванан кIулссия вайннал цинявннал оьрмулул ххуллурду. «Анжи» ареналий «Зенит» дуклакийни, ванал рирщуну дия гьарца футболистнащал цалла сурат. КъакIулли цукун бювхъуссияв ванаща стадиондалий гьарцаннащал хьунаакьин, сурат рищун. Мукунсса, ччинащал аьркинсса маз лякъин шайсса, хасиятралгу, тIуллалгу заллу уссия Багьауттин.
Колледжрал, университетрал пишалийсса даву лякъиннин оьна ацIан къаччай, Багьауттин зий ия строительствалий. Луглай икIайва цалва мюрщими уссурвавран бансса хъинбалдарах.
ХIайп, лавгунни тухумралгу, агьулданулгу авур хъун дуллалисса жагьил.
Ва захIматсса кьурчIишиву духIансса ссавур дулуннав Аллагьнал ниттихьхьун Лаура­хьхьун, ниттил буттахьхьун Жамалуттиннухьхьун, ниттил ниттихьхьун Аьишатлухьхьун, уссур­ваврахьхьун Ибрагьинну­хьхьун ва Расуллухьхьун, циняв­ппагу уссурссуннахьхьун.
Яраппий, ванан бакъасса оьр­му гъан-маччанан булуннав. Багьауттиннул рухI алжаннаву дишиннав, цан алжан нясив баннав. Амин!

Карашрал жямат

---

Сяъдул душ Сулайманова Рукьижат

Июль зурул 9-нний оьрмулул 80 шинаву дунияллия лавгунни ххаллилсса хъамитайпа, Гъумучатусса Бугъуннахъал Сяъдул душ Сулайманова Рукьижат.

Гъумучиял школа къуртал бувну мукьах Рукьижат зий бивкIун бур Лакрал райондалул исполкомрай, зийгу бивкIун бур микку пенсиялийн букканнинцIа. Ванил, хъунигу бувну, чивун буккан бувну бур ххаллилсса кIива душ ва шама арс.
Рукьижат буссия дакI-аьмал хъинсса, аьчухсса, аьркиннал чIарав бацIан хIадурсса инсан. Гъумучиял жяматрангу ххишала бакъа бусравсса бия Рукьижат. Яла-яла гъанчунал ялув дакI цIуцIисса, гьарцаннаяту ка чан къадувайсса буссия.
Цила оьрчIругу, оьрчIал оьрчIругу личIлулну, аькьлу-кIулши ххину тарбия буллай бивкIсса нинугур, бавагур Рукьижат.
Рукьижат аьпалухьхьун лагаврил пашманшивугу кIидачIлай, дакIнийхтунусса жижара буллай буру ванил арсурваврахь, душваврахь, уссурваврахь, ссурваврахь. Цил бунагьирттал аьпа баннав, рухI бигьаний дишиннав, имандалий лавгун хьуннав.

Гъумучиял жямат, райондалул администрация