Июньдалул 6-нний «Дагестан» РИА-лий «ТIиртIусса власть» проектрал лагрулий ДР-лул тIабиаьтрал сурсатирттал ва экологиялул министр Набиюлла Къарачаевлущалсса пресс-конференция хьунни. Шикку министрнал гьарта-гьарзану цала ведомствалул махъ ппурттуву дурсса агьамсса давурттая бувсунни.
Н. Къарачаевлул бусаврийну, цIана вай зий бусса бур халкьуннал къатрава, идарарттава дуккан дурсса кьянкьасса ччюрк ла-яла даврил масъалалуха, утилизациялул аралуха. Масалдаран, цIана ва даву цала бакIрайн ласунсса оператор язи угьавриха зий бусса бур.
«Ва даву ца ххуттавун рутаншиврул, жу багьандаран ряхва бутIуйх дачIарду республика. Ца бутIувун ласарду 500 азараксса инсан. Мукунна халкьуннал экьилирчусса ТБО-лун гихунмай ци бантIиссарив бусласисса схема дарду. ЧIал къавхьуну вайннуха зунсса оператор язи угьантIисса тендр баян бантIиссар. Хъирив тендр дурххуманащал 15 шинайсса кьутIи цIакь дантIиссар», — бувсунни министрнал.
Н. Къарачаевлул кIицI бувунни, кьутIилийн бувну, республикалий операторнал бувантIишиву ччюрк духлаган дувансса полигонну, машан ласунтIишиву хасъсса спецтехника, бишинтIишиву ччюрк дичинсса къуршив ва м. ц.
Бувсунни ванал мукунма, ттинин Дагъусттаннай санкциярду къабуллусса 1200 свалка диркIшиву. ХъунмурчIин ми дурну дур машинарттал хъун ххуллурдацI, неххардицI, бярдацI ва цаймигу кIанттурдай.
