«Анжи» командалува лаглай ур 9 футболист. Миннавух бур «Анжилущал» буккан икьрал дурну ва ижаралий бувцуну бивкIсса футболистал: Светослав Георгиевский, Аслан Дуриев, Андрей Лях, Сергей Каретник, Дмитрий Щербак, Александр Фильцов, Александр Жиров, Саид Эззатоллахи, Фелисио Браун Форбс, Сергей Паршевлюк.
Ижаралий бувцусса футболистал Аез Гулиев ва Филипп Бурковский ялун нанимур сезондалий личIантIиссарив ттигу базисса затну бакъар.
ЦIуну бувкIсса футболистурава ур 3 «Анжи-Академиялул» хIадур увсса спортсмен: Анвар Панаев, Жамал Жяъпаров ва Сергей Бабкин. Луганскаллал «Заря» командалува увцунни Игорь Чайковский ва «Томь» командалул къапучи Сергей Ильёв.
ЦIусса футболданул тIуркIурдал чIумуйн вардиш хъанахъисса цалчинсса батIаву хьунни июньданул 7-нний МахIачкъалалив. КIилчинсса бутIа байбишинтIиссар Словениянаву июньданул 21-нний. Шикку «Анжи» команда хьунадакьинтIиссар контрольданул тIуркIурдай «Динамо» Бухарест, ЧФР Клуж, Астра Джурджу, «Чукарички» Белград, «Жилина» Жилина, «Хайрук» Сплит командарттащал.

Р. Къардашов