Майрал 31-нний АьФ-лул Президентнал Ухссавнил Ккавкказуллал федерал округрайсса вакил Олег Беловенцев къуллугърал аьрххилий Дагъусттаннайн увкIунни.

Дагъусттаннал ХIукуматрал Председатель Аьбдуссамад ХIамидовлущал га лавгунни Дарбантлив, кугьна хьусса къатри лекьан дурну, гайннун кIанай бизан буллалиминнан цIусса къатри дуллалисса кIанттурду ххал бигьин.
НукIу заманнул Жума-мизитраву Олег Беловенцев хьунаавкьунни Дагъусттаннал муфтий АхIмад-хIажи Аьбдуллаевлущал, ганащал цачIу ххал бивгьунни Дагъусттаннал муфтият Ухссавнил Ккавкказуллал Бусурманнал координациялул центрданущал хIала-гьуртту шаврийн багьайсса цаппара масъалартту.
Президентнал вакил мукуна ивунни «Нарын-Къалалийнгу». «Шикку рухIгу, ссихIгу, ссихIиргу бур, ссихI ласавугу цамур куццуйсса дур. Дарбантуллал культуралул ирс жува ябан аьркинссар», — увкунни ганал.
Яла къалалул музей-заповедникрал директор Аьли Ибрагьимовлущал цачIу бусравсса хъамаллурал ххал бунни «Нарын-Къала» ва музей-заповедник.
Къуллугърал аьрххилул лагрулий Олег Беловенцевлул ххал дунни шагьрулул зуманицIух (хьхьирил зуманив) дуллалисса давуртту, рязину ливчIунни тикку ккаркмуния. Тикку дуллай бур «Развитие Северо-Кавказского федерального округа до 2025 года» тIисса паччахIлугърал программалий ккаккан дурсса давуртту.
Олег Беловенцевлущал архIал Дарбантлив бувкIссар ДР-лийсса главный федеральный инспектор Василий Колесников, ДР-лул культуралул министр Зарема Буттаева ва муниципалитетрал бакIчи Малик Багълиев.
Дарбантлия увкIун махъ Олег Беловенцевлул ва Рамазан АьбдуллатIиповлул дунни Аьрасатнал Президентнал хIукмурду ва тапшур бавуртту дузрайн буккан баврин хасъсса батIаву. Яла Рамазан АьбдуллатIипов хъамаллуращал цачIу бивунни МахIачкъалаллал хьхьирил машлул портрайн.

ХIадур бувссар ХI. Аьдиловлул