Майрал 24-нний ва 25-нний МахIачкъалалив хьунни панкратиондалул оьрчIал ва чIава жагьилтурал турнир. Муний гьуртту хьунни сайки 100 спортсмен.

ХIасан Аьдилов
Турнирданул сакиншинначи, панкратиондалул республикалул хъунама тренер Аьвдулкарин Айгуновлул бувсъсса куццуй, укунсса оьрчIал ва чIава жагьилтурал турнирду дуллантIий бур чIумуя-чIумуйн. ХьхьичIва бай­сса бивкIссар панкратион ххираминнансса бяст-ччаллу, XVIII ттуршукулий Ккавкказуллал миллатирттал тархъаншиврухлу талатаврил бакIчи Сурхай-ханнал аьпа абад баврин хас бувну.
Ва ххуллух тIурча, турнир хас дурну дур чемпионшиврул мухIулттив ласаврин.
Турнирданул данди буккавуртту хьуну дур Сепаратор поселокрайсса залдануву, финалданулмур бутIа тIурча, — «Армор» тIисса спортзалдануву.
Цалчинсса кIану бувгьуну бур «Молодой дракон» тIисса спортклубрал командалул (каялувчи Олег МахIаммадов). КIилчинмур кIану бувгьуну бур «Воин» тIисса аьрали спортрал клубрал командалул (каялувчи Руслан Ражабов). Шамулчинмур кIану – Госенаьлиевлул клубрал (каялувчи Расул Госенаьлиев).
Чемпионтурал мухIулттив ларсун дур Артур Аракеловлул (57 кило) ва МухIаммад ЗухIрабовлул (63 кило).