ЦIуминалийсса ТIюхчардал школалий хьунни, 1999 шинал сентябрь зурул 5-нний ЦIуссалакрал аьрщарайн ххявхсса къачагътурайн данди авцIуну, жан дуллусса милицанал зузала, хъунама лейтенант, КьурбанмахIаммадлул арс Давдиев АхIмадлул аьпалун хас дурсса мюрщи жагьилтурал дянивсса каратэлул турнир.
Аьдатравун дагьсса ва турнирданул сий ялу-ялун гьаз хъанай дур ва шиная шинайн гьарза хъанай бур гьуртту хъанахъими. Республикалул личIи-личIисса районная ва шагьрурдая шикку гьуртту хьун дуркIун дия чIярусса командартту. БувкIун бия каратэлухун багьсса республикалул 8 спортрал клубравасса 110-нния ливчусса спортсментал.
Ми бяст-ччаллал сакиншинначиталну ва спонсорталну бия тренертал уссурвал Арсен ва Руслан ХIаммадовхъул, АхIмад Давдиевлул хъунама уссу Сайпуттин, мукунма ЦIуссалакрал райондалул физкультуралул ва спортрал комитет.
Турнир дайдихьлай, ихтилатру бунни ЦIуссалакрал райондалул хъунаманал хъиривчу Алик Исрапиловлул, Республикалул Халкьуннал Мажлисрал депутат Амирхан Амирхановлул, КIулшивуртту дулаврил управлениялул хъунамана Руслан МахIаммадовлул, Спортрал комитетрал председатель Анзор Абакаровлул, ЦIуссалакрал райондалул ДЮСШ-лул (№1) директор Сергей Аьлимовлул, Дагъусттаннал «Кекусинкай» каратэлул Федерациялул президент, 6-мур дандалул даражалул спортсмен, соревнованиярттал хъунама судья Арсен ХIаммадовлул.
Финалданийсса ягинсса бяст-ччаллу къуртал хьуну махъ хьхьичIунсса кIанттурду бувгьуминнан буллунни кубокру, медаллу, дипломру ва хасъсса призру.

А. Аьбдуллаева