Июнь зурул 16-нний Москавлив, Рамазан зурул чятирдануву, дунни Лакрал кьини. Москавливсса жагьилтурал (ММОЛ «Лакия») хIарачатрайну, чятирдануву зума итадакьин цачIун бавтIунни Москавлив ва областьрай яхъанахъисса лакрал агьлу.

Ккурандалул вакил 1-мур ЦIувкIратусса ­Оьмар ГъазимахIаммадовлул бувсунни жул корреспондентнахь ти­кку, исламрал хIакъиравусса хайр- мюнпатрансса ихтилатру бакъагу, лакрал лаххиялул презентациягу хьушиву.
«Искусствовед ПатIимат ХIа­ммадовал ва тарихчи Зураб ХIажиевлул бувсунни жулва ппухълу цукунсса янна лахлай бивкIссарив. Ккурандалул давурттавух мудангу чялишну гьуртту шайминнал хIарачатрацIух кка­ккан буварду Сурхай-ханнал заманнайсса иширттал сценка. Дяркъу­сса кьини дунугу, чIявусса инсантал бувкIунни. ЧIарав бацIаймигу чIявуя, миннахь цинявннахь барчаллагь тIий, кIицI лаган ччива мудангу чIарав бацIайсса Ибрагьим Гитинаевлул, Камила ПIаркьуевал ва Аслан Сагидовлул цIарду. Махъсса ппурттуву жул ккурандалул тамансса ххуй-ххуйсса давуртту дурссар. Зума итадакьин цачIун батIаврилгу исват бунни дагъусттан агьали, цивппа чув бухьурчагу, цалва миллатрал культуралул ва диндалул аьдатирттал хIурмат буну къу­ццу тIий бушиву», — увкунни ­Оьмар ГъазимахIаммадовлул.

Лажин хIадур дурссар ПатIимат Рамазановал