ДР-лул ХIукуматрал Председатель Аьбдуссамад ХIамидовлул муниципалитетирттал бакIчитурайн тапшур бунни капремонтрахсса взносру ратIаву гьарза дан. Тапшур баву дунни «ЖКХ-2017» тIисса республикалул форумрал чIумал.

ХIасан Аьдилов
Республикалул премьер-министрнайн ца хъамитайпалул чивчусса чагъарданий бивкIун бур, чIявусса инсантуран бувчIлай бакъар, миннал дуллалисса взносрал арцурду цукун, чун харж дуллалиссарив, мунияту взносругу дуллай бакъар тIий. Мунийн бувну Аьбдуссамад ХIамидовлул властрал органнайн тапшур бунни кIантту-кIанттурдай агьалинащал хьунабакьлан, бувчIин буллан взносру циван ратIлан аьркин­ссарив ва ми арцу чун харж дуллалиссарив.
Форумрай мукунма гьаз бунни управляющий компаниярттал къат­рал аьркиншиву бардигьаврил давуртту лахъсса даражалий даврил масъала. Тиккува бувсунни утти республикалий управляющий компаниярттал къатрал аьркиншивур­тту бартдигьаврил давуртту лайкьну къадулларча, ми лицензиярттацIа бан тIий бушиву.
Форумрай бувсунни гьашину январьданул 1-ннийнин циняв шагьрурдай капитал ремонтрал давуртту щаллу-ккурккину къуртал дурну душиву. 2016 шинал кутIасса чIумул план дузрайн дуккан даврийну къатраву ялапаршиндарал шартIру ххуй дурну дур 4832 инсаннал.
ДР-лий 2016 шинал капремонтрахсса взносру ратIаву хьуну дур 25,4 процентрал, 2015 шинал – 15,64 процентрал. Взносру ратIаврил даву ххуйну дачин дурну дур Дарбантлив – 69,2%, Избербашлив – 70,9%, Каспийскалий — 45,6%.
Капитал ремонтрахлу­сса взносру ратIаву гьарза даву му­рад­рай, цIанасса ппурттуву Ма­хIачкъалалив, расчетно-ка­ссовый центрдай ишла дуллай бур цасса счет-квитанциярдал гьанулийсса ЖКХ-лул хIаллихшиннахсса багьри ласаврил система. Умуд бур, му система щурущи дурну, цайми шагьрурдай кунна, взносру чIяруну ратIланшиврийн.