ХIАЖИБУТТАЛ АРС ХАВЧАЕВ МАХIАММАД
Июньдалул 10-ний 2017-ку шинал, хъунмасса хIаллай къашавайгу ивкIун, ахиратравун лавгунни МахIаммад Хавчаев.
МахIаммад увссар 1939-ку шинал Кьукуннал шяраву Хавчахъал ХIажибуттал ва ПатIил кулпатраву. Ца чулуха Хъун дяъвилул шинну, вамур чулуха хъунмасса кулпат, МахIаммадлун чIивинива захIматрал кьадру бувчIуссар. ОьрчIнийва ккавкссар МахIаммадлун колхозрал даврийсса жапагу, уччиннин ччатI къабувкусса чIуннугу, къаккарккун лирчIмурдив анжагъ къайгъу бакъасса оьрчIшивур.
Аьрали бурж лавхъун махъ, цила чIумал дан къархьумур хъирив лаян дуллай, М. ХIажиевлул цIанийсса заводрай зийгу унува, МахIаммадлул, кьунниялай дуклай, бувккуссар дянивмур школагу, МахIачкъалаллал музыкалул училищагу, Дагъусттаннал педагогикалул университетгу.
МахIаммадлул хасият къакIулманал учинссар, муххал усттар чув ур, балайчи чув ур куну. Амма къабахIаймур базин кIункIу тIисса хасиятрал заллусса МахIаммадлул, хъунасса италиян балайчи Титта Руффол кунма, ми кIивагу пиша цайнма лавсун, бачин бувну уссия. Хавчаевлул оьрмулул хъиривмур шачIану хьуссар «Илчи» кказитрай зузавугу.
Ванал ирглийсса хиялну хьуна лакрал халкьуннал музыкалул инструмент, ляхъан бувну, буккан баву. Мукунсса инструмент бансса дагъусттаннал Страдиварих луглай, МахIаммадлул хъунмасса хIалгу бувна, биялсса харжгу буккан бувна. Мунин цIагу дирзуна «Лакмузин» (лакрал музыкалул инструмент).
Хъинну хIурмат буну уссия МахIаммад Хавчаев М. ХIажиевлул заводрайгу. Цимирагу шинай уссия заводрал Ветерантурал советрал вакилну.
МахIаммад Хавчаевлун дуркссар чIярусса паччахIлугърал лишанну: «Дагъусттаннал лайкь хьусса артист», «Бусравсса строитель», «ЗахIматрал ветеран», ванан дурккун дур ацIнияхъайсса «ДакIний личIаврил» ва «Юбилейрал» медаллу.
«Илчи» кказитрай зузисса чIумал рирщусса тамансса макьалартту дакъа, Хавчаевлул итабавкьуну бур кIива лу: лирикалул асардал «Эшкьи ва ччаву» тIисса ва «М. ХIажиевлул цIанийсса заводрайсса кьукун» тIисса.
Дия личIи-личIисса азарду кьюлтIну цIуллу чурххахун дахчинмуних луглай. Ххихьунни миннул гужру. Амма учин къабучIиссар ми цIуллу-сагъшивунияр ялтту дурккунни куну: МахIаммад ва ванал кулпат ХIурия Хавчаевхъал шама цIакьсса арс уссар, нитти-буттал бувгьусса гьанна зияда бансса. ДакIния къауккантIиссар МахIаммад гъанцириннангу, шяравучалтрангу, гьалмахтурангу. РухI хъинний дишиннав цал.
Кьукуннал жямат
ва М. ХIажиевлул заводрал коллектив
ХIасаннул арс МахIаммадов Низами
Вай гьантрай Москавлия бявкъусса хавар бавунни 1-мур ЦIувкIуллал жяматран: къашай хьуну, 54 шинал оьрмулуву ХIасаннул арс МахIаммадов Низами дунияллия лавгсса. Хъуна-хъунама арс ахиратравун тIайла увксса къюву духIлан багьунни ХIасаннун ва Жамилатлун.
Буттал шяраву школа къуртал бувайхту, Низами дуклан увхссия Дагъусттаннал политехнический институтрал гидромелиорациялул факультетрайн. Институт къуртал бувну махъ зий уссия личIи- личIисса давурттай: республикалул Магистрал каналлал управлениялий инженерну, ПМК-лул мастерну, «Метал Яны» тIисса идаралий монтажниктурал бригадалул хъунаману, прорабну. Билаятрай паччахIлугърал идарартту лакьлакьисса ппурттуву Москавлив ивзун, бизнесрахун агьну уссия. Гидромелиорациялул элму ххуйну кIулсса инженер акъагу, Низами каруннил пагьму бусса, ччимур даву дюрхъуну дувайсса усттар уссия. Ванан кIукъакIулсса пиша бакъассия. ДакI-аьмал хъинсса, инсантуращал хIал бавкьусса, шяраваллил жямат ххирасса инсан уссия.
Низами дунияллия лагаврил кьурчIишиву кIидачIлай, жижара буллай буру ванал буттахь ХIасаннухь, ниттихь Жамилатлухь, оьрчIахь, уссурваврахь, ссурваврахь, цинявгу гъан-маччанахь.
Низамил рухI хъинний дишиннав, гьаттай нур дизаннав, ванан къабуллумур оьрмулул бутIа наслулун ххи бувну лякъиннав.
1-мур ЦIувкIуллал жямат
Апрель зурул ахирданий жуятува личIи хьунни ххаллилсса хъамитайпа, Ростов шагьрулий ялапар хъанахъисса Гъумучатусса Ханова Разият.
Ва бия ххирасса кулпат, аьзизсса нину, иминсса бава, даврий бусравсса, бакъа чара бакъасса дус.
Хъуннасса кьурчIишиву кIидачIлай, жижара буллай буру Разиятлул лас МахIаммад-ХIажинахь, уссу Зайнуттиннухь, душру Надеждахь ва Аьжахь, куявтурахь, душнил оьрчIахь.
Ци банну, Аллагьнал чичрулун чаран бакъассар. Ванил рухI хъинний дишиннав, гьав нурданул дуцIиннав. Махъминнал оьрмурдай барачат бишиннав. Амин.
Зущал дакIру цачIусса Шахьуватусса Муса МахIаммадовхъал кулпат
