Жунма цинявннан байран байранну лирчIун ччан бикIай. Ччан бикIай ссалчIав ва щилчIав жулла дакIру аьсив къадурну. Хаснура, инсантурал дакIурдиву рахIму-цIимилул гьанна куртIгу, цIакьгу буллалисса, ххуймур, хъинмур буллан хъит учин буллалисса Зумаритавал байран.
Амма «бюрукъатIрахун» къабахчуну къаличIару байрандалул гьантрайгу. Гьар шинах байран къуртал шай кьинилул хIакъиравусса аваза гьашинугу бия.
МаркIачIан чак бувайхту кIул хьунтIиссар тIий, агьали, байрандалийн хIадур хъананссарив, къахъананссарив къакIулну, къазразанну бия. Хъирив кьини, июньдалул 25-нний, байран дикIантIишиву мяйжан бувайхту, чIявусса агьали ливчIунни гьаттардийн биян къавхьунува. Республикалул Муфтиятрал байран 25-нний душиву мяйжан бувайхтугу, цаппара районнал ва шяраваллал дунни 26-нний.
Гьар шинахсса цамургу «хъалул гурга» дия гьашинугу: тIанкI дурсса лагрулий гьаз хьуну бия дуки-хIачIиялийнсса багьри. ЧIаравва бяъли ххяххайсса республикалий бяълилул багьа бия кило 250-300 къурушран. Гьаз хьуну бия цаймигу ахъулссаннул ва дикIул багьри. «Бивщунал бя, кьуркьунал тIама» тIисса къуртIлий.
Интернетрал, смартфоннал каширду хъунисса хIакьину кувннал кув барча буван видеорду, смс-ру тIайла дуккай бигьанна. Ягу хъунисса, щилчIаввавгу къабуккайсса, цакуццуйсса текстру. ДакIнийхтуну цала мукъурттийну учин ччимур чичайсса нажагьсса бур. Туну, карчI цIакьсса гьалмахчу ухьувкун, пикри буллай захIмат буллан ссан аьркинни мукъурттил ялув. Ца авурсса сурат-открытка тIайла дукканссар АьличIангу, ВаличIангу, ПатIиматлучIангу, МаржанатлучIангу. Яла дакI зия дуллалимур затрив бия, соцсетирдайсса лакку мазрайсса открыткартту. Лакран гъалатI бакъа лакку мазрай чичинмагу къакIулсса хханссар. КъакIулну бухьурча, кIулнахь цIувххуну хъиннихха. Байран кьини духьувкун, асар хьунсса махъ учин ччай бакъая щийнчIав. Амма ялунчIингу укунмасса ишру тикрал къахъананшиврул укъавкуну бацIан къавхьунни. Лакку мазрал хIурмат бикIан аьркинни жучIава, барча буллалиссару тIий, мазрай ябацIу къабуллай.
ЯлунчIингу зумарду дугьлангу, байранну дуллангу цIуллушиву дулуннав, ххирасса лак! Кьамул даннав Аллагьу Тааьланал зу дургьусса зумардугу, кьамул буваннав бувсса хъинбалардугу!
ПатIимат Рамазанова
