КъатIивтIунни ссупра
США- нал президент Дональд Трамплул Зумаритавал байрандалун хасну гьар шинах дувайсса шадлугъ къадунни гьашину.
Зумаритавал байран дувайсса аьдат дуккан дурссия президент Бил Клинтоннул, му аьдат цIакьну дурурччуссия Джордж Буш чIаваманал ва Барак Обамал. Мяйжанссар, бусурман агьлу байрандалущал барча бунни Трамплул, амма шадлугърал ссупра къатIитIаврил савав къабувсунни.
Бахшиш хьунни тархъаншиву
Ираннал бакIчи Айотолла Али Хаменеил Зумаритавал байрандалул хIурматран дуснакьирттава итаавкьунни 1049 инсан. Тайннал конституциялийн бувну, Ираннал бакIчинахь дусса дур ихтияр дуснакь бувми тархъан бувангу, миннал дуснакьравусса чIун чIири личIан дувангу. ТIайлассар, судрал хъунаманал маслихIатрайн бувну.
Душ бацин ччай бивкIсса шатта
Таиландрай, Чаченггсау тIисса провинциялий, мукьра метра лахъишиврул дусса шатта бувххун бур ацIра шинавусса душ бусса къатлувун. ЩинчIав зарал къахьунну шатта бугьан хьуну бур цаппара арамтуннаща.
Оьбалалун кьамул дуллалисса законну
Польшанаву совет заманнул чIумалсса гьайкаллу дукьлай байбивхьуну бусса бур. Укунсса хIукму бувну бур ларгсса шинал. Кьамул дурсса закондалийн бувну, гьайкаллу дукьаврицIун, кIичIирттан дирзсса цIардугу даххана дуллантIий бур. Аьрасатнал ПаччахIлугърал Думалул депутатътал бур, Польшанал властирдал ми гьайкаллу дукьансса закон дурусну июнь зурул 22-нний кьамул дувавугу Аьрасатнал оьван дуллалисса давур тIий.
Сталин, Пушкин, Путин
«Левада-Центрданул» цIувххуну, кIул дурсса хIасиллайн бувну Аьрасатнаву гьар заманнай ва гьарцагу агьалинал дянив яла машгьурма усса ур СССР-даний каялувшиву дуллай ивкIсса Иосиф Сталин. ЦIувххуминнава 38 % агьалинал Сталиннухлу бур. Уттисса Президент Владимир Путин ва шаэр Александр Пушкин кIилчинмур ххуттай бур. Миннахлу бур 34% агьалинал.
Ххирану дарцIусса ссихьу
«Победа» авиакомпаниялул рейсрай, мукьра шинавусса душнищал Екатеринбурграя Сочилийн леххан нанисса хъамитайпалун, чIивисса душнил каруннивусса ссихьух 999 къуруш арцул дулун багьну бур. Ссихьу укра салондалувун ласун ихтияр дакъасса дур.
ХIадур бувссар П. Рамазановал
