«ТIювал-коммунал хозяйство – 2017» тIисса Республикалул цалчинмур форум хьунни майрал 30-нний МахIачкъалалив. Форумрай гьуртту хьунни Дагъусттаннал ХIукуматрал Председатель Аьбдуссамад ХIамидов, Халкьуннал Мажлисрал Председательнал хъиривчу Камил Давдиев,Аьрасатнал Минстройрал ЦНИИП-рал каялувчи Марат Чабдаров ва цаймигу.
Гьуртту хъанахъими кIул хьунни «Модернизация ЖКХ. Технологии» тIисса ттизаманнул выставка-экспозициялущал.
Форумрал делегатътурал ххал бивгьунни ЖКХ-лул тагьарданул ва ялун дучIансса чIумуву хьунсса дахханашивурттал хIакъиравусса масъалартту. ЧIаххувсса регионнал ЖКХ-лул предприятиярттал каялувчитурал бувсунни цалла даврияту ва захIматшивурттаяту.
Пленар батIаврий хъамаллурахь аьла-ссалам буллалисса махъ лавхъунни Республикалул премьер-министр Аьбдуссалам ХIамидовлул. «ТIюва-коммунал хозяйствалул предприятияртту цуксса хьхьичIуннайну зий дурив, муксса ххуйсса хIаллихшиннугу дуллалиссар миннул агьалинан. Дагъусттаннал БакIчи Рамазан АьбдуллатIиповлул ДР-лул Халкьуннал Мажлисрайнсса Рисалалуву тапшур бувна коммунал инфраструктуралул объектирдал даву ххуйну дачин дуван, ми тапшур бавурттахлу жаваб дулавугу ккаккан дуруна. Гьай-гьай, му бутIул хъунмур захIматшиву – фондру дух шавур, ми захIматшивуртту салкьи хъанай дия ацIрахъул шиннардий. Тагьарданул захIматшиву хъун дуллай дур ЖКХ-лул предприятиярттай буржру бушаврилгу. Мукунсса тагьар духьувкун, инвестортуран ччай бакъар ЖКХ-лул бутIувун арцу дичлан», — увкунни мунал.
ТIюва-коммунал хозяйствалул бутIул цIанасса тагьардания ва захIматшивурттая бувсунни ДР-лул строительствалул, архитектуралул ва ЖКХ-лул министр Казибек Ибрагьимовлул. Мунал бусаврийн бувну, тIювалул-коммунал хозяйствалул ишакаш дурну дур (оборот) 16,2 млрд. къуруш, ми хъанай дур Дагъусттаннал ВВП-рал 4,1%. Агьалинан дурну дур арцуйну 11,2 млрд. къурушрансса хIаллихшинну. Республикалул ацIвагу шагьрулий хIадур дурну дур коммунал инфраструктуралул системартту лядуккан дувансса программартту. Форумрай ца агьамссаннун ккаллину дия «Формирование комфортной городской среды» тIисса федерал проект республикалий дузрайн дуккан даврил тема. Муния бувсунни ХIукуматрал вице-премьер ХIасан Идрисовлул.
ХIадур бувссар ХI. Аьдиловлул
