Дагъусттаннал УФСИН-лул Жяматийсса советрал мажлис хьунни 1-мур силистталул изолятордануву (СИЗО-1).
Шикку ххал диргьунни цалчинмур дачIи шинайсса Советрал даврил хIасиллу ва уттиния тихуннай дуллантIимур.
Микку гьуртту хьунни УФСИН-лул Жяматийсса советрал председатель Рамазан МахIмудов, Управлениялул ва Советрал вакилтал.

Уголовно-исполнительный системалий инсаннал ихтиярду дуруччаврил управлениялул хъунама, виваллил службалул полковник Рашид Зайнулаьбидовлул барчаллагь увкунни Жяматийсса советравуминнахь дачIи шинал лажиндарай дурсса мюнпатсса даврихлу ва дуснакь бувминнал масъалар­тту щаллу бан кумаг баврихлу. Ванал бувсунни махъсса шиннардий Дагъусттаннал УИС-рал идарар­ттайсса тагьар чIаланну ххуй хьушиву ва хIакьинусса кьини микку­сса шартIру Евростандартирттан лайкьсса душиву. Хъирив Рамазан МахIмудовлул бувсунни дачIи шинал дянив Жяматийсса советрал дурсса даврия. Дин дуллалиминнащалсса давриха зузисса управлениялул хъунаманал хъиривчу МахIаммад МахIаммадаьлиевлул барчаллагь увкунни республикалул Муфтиятрахь, УИС-рал идарар­ттал библиотекарттайн уква диндалул ва художествалул луттирду буллуну тIий.
Дуснакь бувминнал дянив экстремизмалул пикрирду ппив хьун къабитан ялув бацIан аьркиншиву, дуснакьрал идарарттай диндалул агьулданущалсса хьунабакьавуртту дуллан, динийсса лекцияртту ва семинарду ккалан аьркиншиву кIицI лавгунни цала ихтилатраву дуснакь бувминнащал тарбиялул даву дуллалисса отделениялул хъунама, виваллил службалул подполковник Мевлен АхIмадовлул.
— ХIакьинусса кьини хъунна­сса къулагъас дан багьлагьисса ма­съалану бур дуснакьрайми давур­ттал щаллу баву. Производствалул объединениярттал, корпорацияр­ттал, фирмардал каялувчитурайн був­ккун, дуснакьирттал идарар­ттал продукция тIалав дуллали бан хIарачат бан багьлай бур, — увкунни Управлениялул хъунама инженер, виваллил службалул майор Аьбдулхак Аьбдулхаковлул.
Ихтилатру къуртал хьуну махъ Жяматийсса советрал вакилтурал ххал бунни дукра дайсса ва дукай­сса кIанттурду, медициналул часть ва цаппара камерарду. Вайннал мукунма ихтилатру бунни дуснакьлувтуращалгу.

Дагъусттаннал
УФСИН-лул пресс-служба
ХIадур бувссар
А. Аьбдуллаевал