Щалвагу Европанаву яла хъунмур мизит зун байбивхьуну бур Германнаву, Кёльн шагьрулий. Мизитрал чIирттугу, къуппагу пюрундалия бувну бу­сса бур.

* * *
Британиянал машгьурсса дизайнер Джейхун Аннул мизитгу бусса яхта-жамилул проект дурну дур. Яхталий нитти-буттахъансса каюталул чIарав бур оьрчIансса каютагу.

* * *
Нью-Йоркрал пляжру Аьрасатнал дипломатътуран уквассая уттинин, утти Ойстер-Бэй шагьрулул хъуниминнал баян бувну бур къундалия ва бургъия неъмат ласун ччисса дипломатътуран багьа буллан багьантIишиву.

* * *
Эстониянал Йыхви тIисса шагьрулул агьлу администрациялийн аьрзирдай бувккун бусса бур, оьруснал агьлу эстониянал агьулданул гьаттардил чIарав къабучлай, славяннал агьлу бучлансса хIатталлинсса кIану ккаккан бувара тIий.

* * *
ООН-далул хIасиллайн бувну 2016 шинал лихъачалтрал аьдад 300 азара инсаннал хъун хьуну дусса дур. Щаллагу дунияллий бусса бур 65, 6 миллион лихъачалтрал.

* * *
Санкт-Петербургливсса Кьадировлул цIанийсса ламул цIа даххана дурну, «Ахматовский» дирзун дур.
ХIадур бувссар П. Рамазановал