Июньдалул 7-нний Дарбантлив шадлугърал тагьарданий тIивтIунни цIусса Набережная ва шагьрулул пляж.
Шагьрулул социал инфраструктуралул цIусса объектру тIитIаврий гьуртту хьунни АьФ-лул Ухссавнил Ккавкказуллал иширттал министр Лев Кузнецов, ДР-лул ХIукуматрал Председатель Аьбдуссамад ХIамидов ва цаймигу.
Шадлугърал тагьарданий Набережная тIитIин хьхьичI бусравсса хъамаллурал ххал диргьунни ганил лагмасса тагьар. Дарбантуллал Набережнаялувун бухлай бур ххассал байсса станция, 860 метралул манзилданийсса чIира, лесапIитIру ссур дайсса ва бахьтта занансса ххуллурду, спортрал ва оьрчIансса площадкартту, 418 машина бацIайсса кIанттурду, парк ва цаймигу бигьалагайсса къулайшивуртту. Набережнаялул лагру дур 8,6 гектар, лахъишиву – 780 метра, гивун лагайссар 3815 инсан цалархIал.
Шагьрулул агьалинал ва хъамаллурал хьхьичI махъ лахълай, Лев Кузнецовлул увкунни: «Ххаришиву дур жура хIакьину ва аьвзалзаманнул шагьрулул цIусса чIапIи тIитIаврия. ТIитIлай буру шагьрулун 2000 шин шаврил шадлугъирттацIун бавхIуну Аьрасатнал Президентнал ХIукмулул лагрулий дузрайн буккан бувсса Набережная. Жул мурад бия ва ттизаманнул объект шагьрулул тарихрацIун гьарца чулуха бакьаву. Ттул пикрилий, му даву бакIуйн дуккан дуван жуща бювхъунни. На барчаллагь тIий ура архитектортурахьгу, объект бувминнахьгу».
Аьбдуссамад ХIамидовлул Дагъусттаннал БакIчи Рамазан АьбдуллатIиповлул цIаниятугу, Халкьуннал Мажлисрал ва ХIукуматрал цIаниятугу Дарбантуллал агьалинахь барча увкунни ва ххаллилсса объект, Набережная тIитIаву.
БатIаврил ахирданий Лев Кузнецовлул шагьрулул бакIчи Малик Баглиевлухьхьун дуллунни Набережнаярал лишандалунсса кIулли.
ХIадур бувссар ХI. Аьдиловлул
