Асар хьунсса хьхьичIуннайшивуртту

Июньдалул 2-нний Санкт-Петербурглив къуллугърал аьрххилий лавгун уна, Дагъусттаннал БакIчи Рамазан АьбдуллатIипов хьунаавкьунни тих ялапар хъанахъисса дагъусттанлувтуращал.
Мунал бувсунни жула региондалий хъанахъисса хьхьичIуннайшивурттая.
«ХIакьину Дагъусттаннай хъин чулийсса дахханашивуртту хъанай дуссар. Дагъусттан уттава буклай буссар. Агьали чялиш бувккун зий бур республикалуха. Ларкьсса аьрщараву ахънилсса дугьаву махъсса 3 шинай гьарза хьуну дур 38-йлла. Жу хъуннасса къулагъас дуллай буру культуралух. Кугьна хьуну, лекьлакьисса Культуралул къатран кIанай циняв районнай ва шагьрурдай буллай буру Аьрасатнал аьдатирттал культуралул центрду, цIана бувну бур 312».
Рамазан АьбдуллатIиповлул бувсунни мукунма республикалий ххуллурду бакьин баврия, аэропорт цIу буккаврия ва цаймигу дахханашивурттая.
Аьрасатнал культуралул зузалтрал Творчествалул союзрал председатель Анатолий Константиновлул бувсунни уттигъанну ПаччахIлугърал Думалуву хьуну диркIшиву ПаччахIлугърал культуралул политикалул стратегия дузрайн дуккан даврил хIасиллан хасъсса батIаву. «Циняв экспертътурал махъ ца хьуну, цалчинмур кIану буллуссар Дагъусттан Республикалухьхьун. Республикалий буниялагу асар хьунсса хьхьичIуннайшивуртту хьуну дур», — увкунни мунал.
Анатолий Константиновлул бусаврийн бувну, дучIансса чIумуй хьунтIисса Петербургуллал Культуралул форумрай награда дулунтIий бур Дагъусттаннал БакIчинан. Га дур меценатътуран дулайсса Строгановлул премия.
Му хьунабакьаврий Санкт Петербурглив ялапар хъанахъисса хьхьичIунсса дагъусттанлувтуран дуллунни паччахIлугърал наградарттугу. АьФ-лул Конституциялул судрал судья ХIадис ХIажиевлун дуллунни «За любовь к родной земле» тIисса ДР-лул ХIурматрал лишан.
Муния махъ ккаккан дунни концерт.

ХIадур бувссар ХI. Аьдиловлул