Уттигъанну, цала оьрмулул 60 шинал юбилей хъанахъисса гьантрай, жул редакциялий хъамалу уссия НурмахIаммадлул арс Мямма Мяммаев.

Буттал шяраву ЦIуликъянив байбихьулул школа бувккуну махъ Мямма дуклай ивкIун ур интернатрай. 1979-кусса шинал къуртал бувну бур Дагъусттаннал паччахIлугърал педагогикалул институт. 1985-ку шинал увххун ур Москавуллал Юридический академиялувун, къуртал бувну бур 1990-кусса шинал. Зий ивкIун ур МВД-лул структуралий. Муния махъ машхул хьуну ур бизнесрахун. 2002-ку шинайн ияннин зий ивкIун ур Москавлив Аьрасатнал ПрезидентначIасса Дагъусттаннал поспредрал хъиривчуну. Ккалай ивкIун ур Дипломатътурал академиялуву. Дуклай ивкIун ур Американаву.
Мямма увчIуну ивкIссар АьФ-лул ПаччахIлугърал Думалул мукьилчинмур созыврал депутатнугу.
Ванал цIаницIун бавхIусса къуллугъругу цаннияр ца хьхьичIунссагу, жаваблувшиву хъуннассагу бур: «Мастер-М» тIисса финансирттал ва промышленностьрал союзрал президент, «Глобус» тIисса интеграциялул даврицIун бавхIусса дунияллул халкьуннал дянивсса бизнес-клубрал президент, бур му клубрал «интер Глобус» цIанилусса цилва журналгума, мунил редакциялул советрал председательнугу ур Мямма цува.
Мямма, та ухьурчагу, цалва миллатрал, ватандалул, гъан-маччанал ва кIулминнал масъалартту щаллу буллалиминнал хьхьичIкьюкьлуву ур. Уссурвал Хачилаевхъащалгу цIакьсса дусшиву диркIун дур ванал. Мямма ур, республикалий бикIу, Аьрасатнаву бикIу, хъанахъисса хъуни-хъунисса иширттал хIакъираву цала пикри бусса, сивсуну къуццу тIутIисса инсан, хIатта му пикри цал-цал чIявучилминнуцIун къабавкьусса бухьурчагума.
Цалва уттининсса оьрмулий Мямма хьунаавкьуну ур жула билаятрал ва дунияллул политикалул машгьурсса цIарду дусса инсантуращал, паччахIлугъирттал хъуниминнащал.
Цамур бакъахьурчагума, чIиви-кьивисса затну хIисав бан къабучIир, «Глобус» бизнес-клубрал президент хIисаврайгу, хъуннасса политикалуву махъ нанисса инсан хIисаврайгу, 2006-кусса шинал Саоьдуллал Аьрабусттаннайн, Туркнавун, ЦачIунхьу Аьрабусттаннал Эмиратирттайн ва Кипрданийн ванал бувну бивкIсса 12 гьантлийсса аьрххи (официалсса визит). Му аьрххилул хъунмур мураднугу бивкIссар Саоьдуллал Аьрабусттаннайн Аьрасатнал Президент В.В. Путиннул визит хьуннин хьхьичI дувайсса хIадуршиндарацIун ца чIиви-хъунсса бутIа ххи баву. Му иширал агьамшиву тасттикь дуллалисса затну хъанай бур, цува Саоьдуллал Аьрабусттаннайн увкIсса чIумал, давурттал элиталул вакилтуращалсса ихтилатраву «Глобус» бизнес-клубрал бартдигьлагьисса давурттан В.В. Путиннул лайкьсса кьимат бищавугу.
Жула редакциялул хъамаличунахьхьун, иривну унува, буларду жугу цаппара суаллу.
— Мяммай, ина, мяйжаннугу, нажагь акъа ххал къахъанахъисса инсан ура. Чув, ци манзиллай ура ина хIакьину? Цукунсса дур ина дуллалимунил, дан дакIниймунил сияхI?
— ТIайлассар, махъсса шиннардий, нара дуллай ивкIсса давурттал ляличIишиву сававну, учиннуча, специфика сававну, ттуща чивун увккун, гьарца зат илданийх бачIлан, буслан хъанайгу къабикIайва. Уттирив вана на зул хьхьичI, цIувххумунихьхьун бювхъуссаксса аьщуйн щусса жаваб дулун хIадурнугу ура.
— Республикалул политикалуву, иширттаву ина махъсса чIумал уну чIалай акъара, инава политикнал, ишруккаккул биялсса «гьутру» бусса чув-адаминагу унува…
— Политика та-духьурчагу хъинну захIмат-жапасса затри. Кув чIумал личIи бангума къахъанан бикIай мунил узданмур ва чапалмур чул. Ца ххуллух, ванияр арулла-мяйра шинал хьхьичI, Дагъусттаннал ца бакIчи лаглай, ганан кIанттай цама итлатисса ппурттуву, Москавлив хъинну лахъсса инстанциялийнгу оьвкуну, ттун маслихIат буллай бия Кьиблалул Федерал округрал хъунаманал хъиривчуну ацIан, силовиктурал аралул жаваб дулайма заместительну. Му чIумал на куссия, ацIанна, агарда Дагъусттаннал танисса щалва правительство отставкалийн гьан бансса кьасттирай бухьурча куну. На кумур кьамул къавхьуна. Нагу къалавгссияв ттуйнма тапшур буллалисса къуллугърайн. Утти махъгу маслихIат буллай бия лакрал чулухасса вакилну хьхьичIунай ачин. ХIакьинусса Дагъусттаннал хъунамагу ттул чулухунай гьаксса авкьусса-хъинсса ур. Ттухьва мукун маслихIат буллалисса кIанттай на ганахь, хъярчирай кунма, увкуссия: «Дула ттухьхьун ца къуртал хьуну лагавайсса колхоз, совхоз, на му чIирисса чIумул мутталий давраннайн дуккан данна, ккаккиялун дихьлансса хозяйство хьун данна», — куну.
— Тай бала-хатIасса урчIцIалукусса шиннардийгу, ялагу ина чялишну гьуртту хъанайна икIайвав жула миллатрайн багьайсса сайки циняв иширттавух. ХIакьину цукунсса дур лакралми мурадиртталгу, вилвами иширтталгу дянивсса ара?
— Вин ххуйну кIулссар лакрацIун бавхIусса гай яла захIматми, ххававххуми масъаларттал вив, буруккинттал чIарав, Хачилаевхъащал архIал, на мудангу авцIуну ивкIшиву. ЦIуссалаккуйн къачагътал ххявхсса чIумалгу, штатрал бакI дургьуну уссияв на гих. Бувссия арцуйнусса хъунмасса кумаггу. Амма чIявуну ци зат хъанай бикIайрив бусавив? Иш къуманивун багьукун, хьхьичIун бакьин — цавай, къуманивату бувккукун, тахлий битан — цайми. ХIакьинугу сайки мукунма бур. Муниятур жула лакрал бахттигу чIявуну чIиви личIлачIисса. Дугъришиврул дя лякъин къашай – жуллассагу, цайминналссагу. Масала, щяивкIун уссара бур учинсса чиваркIуннал дянив: кувннайн кув хъямала багьлай, цIарду дуллалисса бакъа бакъассар, яла ца, ягу кIия, шама бивзун лавгуннихха – укъачайсса бакъар лавгминнал хъирив. На ца ттулла чичрулуву куссия: «Жула зунттал агьлу, зунтталмур тIул-тIабиаьтрацIагу хьуну, шагьрулулмургу лаласун къархьуну, дянив ялгъузну ливчIун бур», — куну.
Мунийн бувну, на хIакьину, хъунмурчIин, лахъа-хъунсса политикалул аралиятугу махъунай хьуну, бартбигьлай ура лагьсса аьрщарайсса мурадру, цивппа мюрщину чIалачIисса бухьурчагу, цал агьамшиву хъинну хъуннасса. Ттула арсная ва душварая чантI увкусса инсантал хьун бан хIарачат буллай ура. Цанма-цанма лавхьхьусса кIанттурдайгу дуккингу бувну, цанна-цанна хасъсса давурттайнгу бакьав ттулла племянниктал ва племянницахъул – цинявппагу 26 уссар. Ттухь цIуххавай, мугу ккалли бансса зат – мигу жула лакрихха. Гъанминнан бакъассагу, бара мукунма кумаггу цайми-цайми лакрангу, дагъусттанлувтурангу.
Цила чIумал на, цаппара лакрал патриотъталгу лагма лаган бувну, сакин дурну уссияв лакку маз ябаврин, буруччаврин цIа кусса суккушин. Мунил бакIрайвасса фондрайгу буссия нава хьун бувсса 300 млн. арцул. Конкурс баян бувну, дуллай буссияв премияртту. Миккугума, барчаллагь учин кIанттай, валлагь пуланнан, пусттанан премия къадуллунни тIий, ттуйра аьй-бювкьурду дуллай бувккуна.
— Ина цила чIумал «Единая Россия» партиялул ца яла хьхьичIунсса вакилну ияв. Думалул депутатнугу увчIунав. Утти кьукьин дурну дуссарив ганищалсса дахIаву?
— ЦIанасса чIумал акъара царагу партиялуву. Ишру, мурадру ттунма ччисса куццуй, ттулла мяърипатрацIун бавкьуну нани бан къахъанахъисса чIумал, хьхьичIа укьавривура къулайшиву чIалан дикIай. Амма мунил Мямма Мяммаев, гьарца затирттайн кагу галай дурну, «отшельникну» чулий авцIуну уссаргу къатIиссар. Тагьар цамур чулийннай даххана хьурча, ттула бюхъу чIявучинсса мюнпатиран ишла бан хьунсса сант чIаларча, бюхъайссар баххана хьун ттулми пикри-зикрирдугу.
— Ин ша Аллагь. Мукун хьуну лякъиннав. Жу вин му дакIнийхтуну чIагу тIий буру. Ххариссару, та бухьурчагу, вищал «Илчилий» хьунабакьин. Цал уттигу барча вил ряхцIалла шинал юбилей!
— Барчаллагь зунгу. Нагу чIа тIий ура жула бакъа чара бакъасса «Илчилун» тIайлабацIуртту, лябуккуртту.

Ихтилат бувссар Руслан Башаевлул

Чивчуссар Бадрижамал Аьлиевал

***
Ванияр ацIния мукьра шинал хьхьичI НурмахIаммадлул арс Мяммаев Мямман хас дурсса ттула ца чIири-хъунсса макьалалуву на куну бур ванал хIакъираву укунсса зат: «Ттисса ва гьунттийсса чIумул тIалав увсса политик ва ишккакку», — куну. На хIадурну ура хIакьинугу мива махъру тикрал бан. Хъиннува хъуни бувсса махърунугу къачIаланссар тIий ура. Амма махъсса шиннардий политикалул ва жяматийсса иширттал авансценалия Мямма, цукуннив цакуну махъунай хьусса куна, яувцун яхъанай ивкIунни. Духьунссар мунил цин лархьхьусса сававрттугу – цанна ххуйну кIулсса, жущара лаласун къахъанахъисса. Ци бухьурчагу, нава тIимуния на махъаллил хъанай акъара. Лакралгу, Дагъусттанналгу, Аьрасатналгу политикийсса иширттаву Мямма Мяммаев хатIалийсса инсан акъая. Му исватну чIалай бия чIарахминнангу, къачIарахминнангу.
Уссурвал Хачилаевхъул бухлавгния шинмай чIявуминнал тикрал буллалисса затну хъанай бия жула лакрал миллат бакIчитурацIа хьуну ливчIунни тIисса дарихсса пикри. Бюхъай му мукун хьунугу бикIан. Амма, иш багьукун, ца иялчунал кIантту бугьансса цамагу иялчу къалявкъуну къаличIайссар. КъаличIан аьркинссар. Мукунминнавасса цану ттун мудангу чIалан икIайва жува цIана ихтилат буллалисса инсан — ччарча чантI учаврил чулуха, ччарчагу чувшиврул чулуха. Му пIякь бивкIун чIалай бур ванал уттинин бартбигьлай ивкIсса, паччахIлугъирттал даражалийсса, хъуни-хъунисса мурадирттайну ва иширттайну.
Ттинин щаллуну ишла къабувсса ванал бюхъулуцIун ва итххяххаврицIун дархIусса умудрал ххалгу жура кьукьин къаританну.

Р. Башаев

Цитатартту:

«Политика та-духьурчагу хъинну захIмат-жапасса затри. Кув чIумал личIи бангума къахъанан бикIай мунил узданмур ва чапалмур чул».

«Оьрмулуву чIявуну цукунсса зат хъанан бикIайрив бусавив? Иш къуманивун багьукун, хьхьичIун бакьин – цавай, къуманивату бувккукун, тахлий битан – цайми».

«Жула зунттал агьлу, зунтталмур тIул-тIабиаьтрацIагу хьуну, шагьрулулмургу лаласун къархьуну, дянив ялгъузну ливчIун бур».

«Ишру, мурадру ттунма ччисса куццуй,
ттула мяърипатрацIун бавкьуну нани бан къахъанахъисса чIумал, хьхьичIа укьавривура къулайшиву чIалан дикIай».