Дагъусттаннал аьрщарайн хар-хавар бакъа ярагъуннил балгусса къачагътал ххявхсса чIумал, жула халкьуннал ккаккан дурссар цала чувшиву ва кувннал кув бугьаву.

Милицанал зузалтгу, Аьрасатнал аьралитал ва халкьуннал ополченталгу ца хьуну, данди бавцIуссар душманнайн.
Август-сентябрь зурдардий цаппара Дагъусттаннал щархъаву хьусса талатавурттаву чIявусса ливтIуссагу, бивщуссагу хьуссар. Тай оьлувкъусса дяъвилул иширттал чIалачIи бувссар жула чиваркIуннал хIал.
Сентябрь зурул 4-нний Чабанмащилийсса данди бацIавриву къучагъшиврий жан дуллуссар Дагъусттаннал ОМОН-лул зузала, махъ цалчинмур батальондалул командирну ивкIсса, милицанал капитан Сиражуттин Аьлиевлул.
Ленинградуллал паччахIлугърал университетрал юридический факультет къуртал бувсса Сиражуттин Аьлиев Псков шагьрулул следовательну ивтун ивкIссар. Чачаннал дяъви байбивхьусса чIумал ва ОМОН-лул зузалтрал кьюкьлуй каялувшиву дуллай ивкIссар.
Яла анавармур, бюхъу-бажар бумур гуж хIисаврай, ОМОН-лул зузалт мудангу хьхьичI ххуттай бичайссар. Мукун цалчин душманнан баруну бавцIуссар ОМОН-лул зузалт август зурул цалчинсса гьантрай Бущихъиял ва ЦIумадиял районнай. Муниннин хьхьичI Къарамащиливгу… Амма яла захIматми кьинирду хьуссар Къадардал даралуву. ЧIявусса ОМОН-лул зузалтран шикку жан дулун кьисмат хьуссар. Бущихъиял ва ЦIумадиял районнайсса операциярттугу бувну, август зурул 27-нний зузалт МахIачкъалалив, цала базалийн, зана хьуну бивкIссар. Амма хъирив кьинирдай леххаву дуркIун, тIайла бувкссар Къарамащилив ва Чабанмащилив. Къарамащилив къачагътурайн цалчин гьужум бувмину вай хьуссар. Щин щак багьанссия та чIумал тикку къачагътурал цIакь бусса район хIасул дурну диркIсса. Капитан Сиражуттин Аьлиевлул группалул шяраваллил дязаннив, мизитрачIа гьужум бувну, мукьцIала къачагъ бат увссар.
Гъан-маччаминнал бусласимунийн бувну, Сиражуттин ивкIун ур цайнма тапшур бувмур лажин кIялану бартбигьайсса, жаваблувшиву дусса зузала. Цалчинсса Къучагъшиврул орден ванал ларсун дур 1996 шинал Къизлардай ва Первомайскалий хьусса иширттаву ккаккан дурсса чувшиврухлу. Нигь-ццах дакъасса, кьянкьасса жагьилнан танива бувчIуну бур къачагътуращал икьраллу дуллан къабучIишиву, миннан цила багьайкунсса танмихI бан аьркиншиву. Мудангу цала эбратну ивкIсса ппу дунияллия лавгун махъ, цува зузисса Дагъусттаннал педуниверситетрал физвоспитаниялул кафедрагу кьабивтун, Сиражуттин стажерну увххун ур хасъсса патрульданул батальондалувун. Давриву дакI дирхьусса, къуллугърал бурж марцIну бартбигьлагьисса Сиражуттин ччяни гьаз хьуну ур.
ЦIуллу-сагъшиврул тагьарданийн бувну, Къарамащилив къагьан хъанай бунува, къаличIи хьуссар миккугу командир цала кьюкьлуя. Та кьини, сентябрь зурул 2-нний, Сиражуттин Аьлиевлул каялувшиндаралусса, 19 зузалая сакин хьусса ОМОН-лул группа гьуртту хьуссар Чабанмащиливсса операциялуву. Шяраваллил дязаннив бивсса чIумал, вайннайн хар-хавар бакъа гьарица чулуха битлан бивкIссар. Цаламиннайн оьвкуну, командирнал бувсъссар, цивппа къачагътурал вив лавсун бушиву ва шалклува буккансса чаран бакъашиву. Ва талатавриву цинявппагу ОМОН-лул зузалтрайн щавурду дирну диркIссар, амма ми махъаллил къавхьуссар, къакьабивтссар цала позицияртту. Ярагъгу щяв бивхьуну, канийн бучIан маслихIат буллалисса къачагътуращал рухI кьацIул дургьуну талай бивкIссар. Капитан Аьлиев каялувшиву дуллай ивкIссар цалла кьюкьлуй душманнал ккуллалул утаннин. Та чIумал ОМОН-лул зузалтрай къачагътурал ябацIу бувссар.
КIилчинсса Къучагъшиврул орден Сиражуттиннун Аьлиевлун дуллуссар аьпалул хьуну махъ. Милицанал капитан Сиражуттин Аьлиевлул гъан-маччаминнан умуд бур, ванал аьпа абад бан, буттал шяраву Читтурав гьайкал дацIан данссар, мукунма ОМОН-лул цалчинсса батальондалул командир Сиражуттин Аьлиев дуклай ивкIсса школалун,ва цания ца кIичIираваллин ванал цIа дулунссар тIисса. Укунсса вирттал ялун нанисса никиран чувшиврул ва Ватан ххирашиврул эбратну хьун аьркинссар.
Андриана Аьбдуллаева