ЛичIи хьунни жуяту жул даврил ва оьрмулул хьхьичIунсса дус, уртакь

Махъсса кIира-шанна шинал лахъишиврий бала-хатIасса цIуцIаврищал чувшиврий талайгу ивкIун, цала оьрмулул 63 шин хьун ца зурул хьхьичI жуятува батIул хьунни лакрал миллатрал цIанихсса шаэр, гьунар ххисса публицист, журналист, «Илчи» кказит тIивтIусса кьинилия шинай ванил отделданулредакторну, махъсса чIумал хъунама редакторнал хъиривчуну, зий ивкIсса инсан, жул редакциялул коллективрал дянив мудангу кьадрулий ва кьиматрай ивкIсса уртакь, Шяъваннул арс КIурухов ХIасан. Увссар ХIасан 1954-кусса шинал Вихьуллал шяраву, Ккуллал райондалий чIявучин кIулсса ва сийлийсса буттал Шяъваннул ва ниттил Сиянатлул къушлий. Буттал шяраву дянивмур даражалул школагу бувккуну, ванал къуртал бувссар Дагъусттаннал паччахIлугърал педагогикалул институтрал филологиялул факультет. Муния махъ дуклай ивкIссар Москавуллал Литературалул институтраву. «Илчилийн» учIаннин зий ивкIссар Ккуллал шяраву учительну, «ЧIавалачин» журналданул корреспондентну, «Литературалул Дагъусттан» журналданул редакторну. ХIасан КIуруховлул кIунттила дунияллийн бувкссар лакку мазрайсса ва оьрус мазрайсса шеърирдал ххюва лу: «Банавшасса бидавртту» (1983), «ЦIурттал ссурулккуртта» (1987), «ЦIан-чаннал дазуй» (1989), «ЦIарайну марцI буккаву» (1988), «Аксиомирттал ссят» (1989), «ЧIурду ва лишанну» (2008). «ЦIарайну марцI уккаву» тIисса луттирахлу ХIасаннун дуллуссар республикалул Лениннул комсомолданул премия. ЛичIи-личIисса шиннардий лакку мазрайн ванал таржума бувссар дунияллул классиктурал ва дагъусттан шаэртурал шеърирду. Ванан дуллуссар «Дагъусттан Республикалул культуралул лайкь хьусса зузала» тIисса цIагу. ХIасан ахиратрал шаврил дазу-зума дакъасса къумашивугу кIидачIлай, дакIнийхтунусса жижара буллай буру кулпатрахь Зинахь, ссихь ПатIиматлухь, куявнахь Нуруллагьлухь, душварахь Чинарахь, Жамилатлухь, Умаматлухь ва махъсса цинявппагу гъан-маччаминнахь. ХIасаннул бунагьирттал аьпа баннав, рухI рахIатний дишиннав. ЛичIину къачIявусса, амма хъунмасса гьунарданий ва усттаршиврий чивчусса литературалул асардайну ХIасан КIуруховлул цIа личIантIиссар лакрал миллатрал тарихраву, лакгу, лакку мазгу дунияллий буссаксса. «Илчи» кказитрал коллектив