Библиотекалуву – хьхьувай

Библиотекалуву – хьхьувай

Апрельданул 21-нний МахIачкъалалив Р. ХIамзатовлул цIанийсса библиотекалуву хьунни ирглийсса акция «Библионочь – 2017». Ва акция Аьрасатнаву гьашину буллалиссар ряххийлчин, Дагъусттаннай тIурча – шамилчин. Акциялул сакиншинначитал бия ДР-лул Культуралул министерство ва Р. ХIамзатовлул цIанийсса Миллатрал библиотека.

Бадрижамал Аьлиева
Ва хъанай дур шинал мутталий­сса ца кьини библиотекарттал ва цаймигу ва журалул идарарттал нузру хьхьудяризаннин тIиртIусса, вайннул зузалт ва шивун букIлакIими шаппай анавар къабуклакисса.
Акциялул цIа хьхьуницIун дархIусса дунугу, акциялул лагрулийсса щурущаву цурдарив кIюрххил ссят 11-ннийра дайдирхьуна ва лахъи ларгуна ссят хьхьунил 11 хьуннин. КIюрххил ссят 11-нний дайдирхьуна библиотекалуву дуклаки оьрчIансса экскурсияртту, мукунна нажагь бакъа хьунакъабакьайсса луттирдал фондравун­сса мини-экскурсияртту. Кьинилул лахъишиврий хьуна личIи-личIисса хъамаллуращалсса хьунабакьавур­тту, луттирдал выставкарду, видеопрезентацияртту, викторинарду, мастер-классру, творчествалул хьунабакьавуртту, нярансса ва аькьлу-кIулшилунсса тIуркIурду. Тархъан­сса микрофондалучIан увккун, ччинаща бюхълай бия назмурду дуккин.
Агьамми шадлугърурив дайдирхьуна ахттакьуннай ссят 6 хьуну махъ. Шиккун бавтIун бия халкьуннал шаэртал ва чичулт, искусствалул ва культуралул дунияллий цIарду машгьурсса усттартал, республикалул вузирдал студентътал.
Миллатрал библиотекалул директор Аьли Аьлиевлул барчаллагь увкунни ва кьини цачIанма хъамалу бувкIминнахь.
– Шиная шинайн библиотекалул зузалт хIарачат буллай бур зу цалнияр цал ххари бувансса, махIаттал бувансса программа сакин дуван, мунияту умуд бур гьарцаманан цанна хIаз дизанмур ля­къинссар хIакьинугу тIисса. Ялугьлай буру зух «Библионочь – 2018» акциялийгу ва хIарачат буванну му хъиннура хIазну хIадур дувансса, – увкунни ванал.
Дагъусттаннал халкьуннал чичу МахIаммадрасул Расуловлул цалва ихтилатраву кIицI лавгунни ва хьхьунусса батIаврил бушиву ляличIиссава кици, тIин ва чIа увкунни гьарцагу кулпатран гьарцагу хьхьу укуннасса шаву, да­гъусттанлувтурал дянивсса арарду мудангу, ва кьини библиотекалуву кунна, иминсса, тIааьнсса, дусшиврийсса дикIаву.
Шиккува кIицI лаган, ва кьини вара журалул шадлугъру хьунни Нураттин Юсуповлул цIанийсса Республикалул оьрчIал библиотекалийгу.

Читайте также: