Майрал 23-нний Рамазан АьбдуллатIиповлул ва МахIачкъалалив даврил аьрххилий увкIсса дуккаврил ва элмулул бутIул ялувбацIаврил федерал къуллугърал каялувчи Сергей Кравцовлул дунни республикалий Цасса ПаччахIлугърал Экзамендалийн хIадурну бушаврил масъалартту ххал бигьлагьисса батIаву.
«Ва масъалалуха зузиминнан аьркинссар цахъисгу къулагъас ххи дуван. Цалсса, жува конкуренция духIан шайсса пишакартал хIадур буллай бакъассаксса, аьркинни зузалт буцлан цайми регионнаяту, жучIава дипломирттащалсса чIявусса бунувагу. Мунияту жунма аьркинссар ххуйсса, итххявхсса пишакартал хIадур буллан, ЕГЭ дулавривугу хьхьичIуннайшивуртту хьун дуллан», — увкунни Рамазан АьбдуллатIиповлул.
ДР-лул БакIчинал бувсунни республикалий хIадур дурсса программарттал ва подпрограммарттал хъуннасса мяъна душиву дуккаврил даража лавай баврин. Ванал бусаврийн бувну, ДГТУ-раву тIивтIуну бур «Сириус-Альтаир» тIисса итххявхсса оьрчIан дуккаврил центр. Ва иширайну хъанахъиссар Сочилий Аьрасатнал Президентнал сипталийну сакин бувсса «Сириус» центрданул цалчинсса филиал.
«Жунма аьркинссар преподавательтал аттестация дуллали буллан, циняв дуккаврил учреждениярттал давурттан кьимат бищайсса система, школалий ххуйну зузисса методикалул даву. Му чIумалли кIулшивурттугу дикIантIисса. Жулва мурад бикIан аьркинссар Дагъусттаннай яла ххуйми школарду бушаву, школардавату аькьлу бусса ва ххуйну тарбия бувсса оьрчIру итабакьаву», — увкунни Дагъусттаннал БакIчинал.
Сергей Кравцовлул гьаз бунни цIанасса ппурттуву Ухссавнил Ккавкказуллал федерал округрай ЕГЭ дулаврил масъалартту. «На барчаллагь тIий ура махъсса шиннардий ЕГЭ дулаврил даража лахъ баврихлу. Майрал 18-нний Аьрасатнал ХIукуматрай хьусса селекторданул совещаниялий на увкуссия, ЕГЭ дулаврил чIявуми масъаларттан хасну жу эбрат ласлай бушиву Ухссавнил Ккавкказуллал республикарттаяту. Дагъусттаннай ЕГЭ дулаврил даража ябан аьркинссар», — увкунни Рособрнадзорданул каялувчинал.
2017 шинал Дагъусттан ЕГЭ дулаврин хIадурну бушаврил хIакъираву ихтилат бунни ДР-лул дуккаврил ва элмулул министр Шагьаьппас Шагьовлул.
«2016 шинал Дуккаврил ва элмулул министерствалул цIакь бувссар экзаменнайн хIадур шаврил ва ми дулаврил гьануми документру. Дузал дурссар Региондалул информациярттал система (РИС). Цинявппа сияхIрайн лавсун ур экзаменнал 15114 гьурттучи, миннавату 13596 ур га шинал выпускник, 1125 – ларгми шиннал выпускниктал, 343 – дянивсса даражалул школа къуртал къабувсса. Предметирттал комиссиярттал экспертътуран сакин бувну бур лахьхьин баврил семинарду ва квалификациялул экзаменну», — увкунни министрнал. Ганалва бусаврийн бувну, дукIу кунма, гьашинугу республикалий ЕГЭ дулаврил иширттавух гьуртту хьунтIиссар федерал инспектортал.
БатIаврий махъ лавхъунни «Тестированиялул федерал центрданул директор Юлия Егоровалгу.
ХIадур бувссар ХI. Аьдиловлул
