Ларгсса хамискьини «Анжи-ареналул» пресс-центрданий хьунни «КIукъакIулсса Ккавкказ» тIисса турпроектрал сакиншинначитуращалсса хьунабакьаву.
Ва проектрал лагрулийсса «КIукъакIулсса Дагъусттан» тIимур проектрал сиптачи ур жула Дагъусттаннаясса, Пятигорскалий ялапар хъанахъисса, фотограф, блогер Муслим Аьлимирзаев. Бия ванащал бувкIун, цанма кунма, аьрххи-ххуллурду, тIабиаьт, зунттурду, гьалаксса нехру ххирасса, Ухссавнил Ккавкказуллал аьдатру, дукра-къяс, багьу-бизу, халкь кIул хьун ччи­сса цайми шагьрурдаясса блогертал ва фотографтал. ЖучIанмасса ва гьашинумур аьрххи ванал утти кIилчинни сакин бувсса. Цалчин­сса проектрал аьрххи хьуссия дукIу билаятрал личIи-личIисса регионнаясса блогертал, журналистътал ва фотографталгу бавтIун.
Муслимлул ва ва кунмасса жула жагьилтурал соцсетирдай проект машгьур буллалаврил мурадгу бур аьрасатлувтуравун зунттал билаятрайн хъамалу бучIансса гъира бутаву.
Жула СМИ-рдал журналистътуращал хьунабакьин хьхьичI, сакиншинначитурал хъамаллуран ккаккан бунни цIанихсса «Анжи-арена». Хъамаллуран бакъа, шиккувасса жунгума ттинин къакIулссия ва мяйжаннугу уттизаманнул тIалавшиннардайну бувсса, хъинну авурсса спорткомплекс бушиву.
ЧIирисса экскурсиялия махъ Муслим Аьлимирзаевлул ва ванащал Санкт-Петербурграя, Краснодардая, Пермьрая бувкIсса аьрххилул гьурттучитурал журналистътурал буллусса суаллахьхьун жавабру дуллунни. Бия вайннавух жулла республикалийн ттинин цимилагу бувкIссагу, дахьва цалчин бувкIссагу.
Пресс-конференция тIитIлай, Муслимлул бувсунни ларгсса шиная шинмай проектрал лагрулий цала Ухссавнил Ккавкказуллал регионнай, хаснува Дагъусттаннай, бивтсса ххуллурдая, бувсунни цIунилгу проект сакин баврил мурадрая ва му цуксса щаллу хъанай буссарив. Ванал бусаврийну, хъамал жучIава лахъи лаган тIий бур апрельданул 26-ннин ва биян тIий бур Лакрал ва Гъуниннал районнайсса щархъавун. Блогертурал ва фотожурналистътурал цала блогирттаву бусса кIанттая репортажру дуллантIиссар ва соцсетирдаву суратру дишинтIиссар.
Ухссавнил Ккавкказуллал регионная вайннал ттинин ва проектрал лагрулий, «неизвестныйдагестан» тIисса хэштегралу, аьмну щала Ккавкказуллая Инстаграмраву дурну дур 11000 публикация.
Муслимлул бувсунни «КIукъа­кIулсса Ккавкказ» проект цIубакI­райва сакин бувну бивкIшиву журналистикалущал, туризмращал цукунчIавсса дахIаву дакъасса, так зунттурду, тIабиаьт ххирасса минахуртурал. Проект сававну цачIун хьушиву укунсса 300-ха ливчусса инсан. Вайннал мурад бур гьар шинах 10-ксса аьрххи сакин буллан­сса. Гьашину майрай проектран хьунтIиссар ца шин. Аьрххирду сакин бантIиссар СКФО-рал регионнайсса иш-тагьарданух, тIабиаьтрал шартIирдах бурувгун.
Петербурграя, Пермьрая бувкI­сса хъамаллурал кIицI бувунни, цивппа Дагъусттаннайн ва ххуллух цалчин къабувкIшиву ва дукIусса цалчинмур аьрххилия цивппа дакIру шикку кьариртун шаппай зана хьуну бивкIшиву. Шиккусса халкьуннал, тIабиаьтрал цIунилгу цайн ссапарданийн буккан оьвкушиву.
М. Аьлимирзаевлул кIицI бувунни цал умуд бушиву туриндустриялухун машхул хьуминнал цал дуллалимуницIун кабакьин­тIишиврийн ва цачIу, хIала-гьур­ттуну жулла республикалул туризм тIутIайх дичин дурну, багьайсса даражалийн дуцин аьркиншиву.
Пресс-конференциялул ахирданий гьурттучитурал дяниву МахIачкъалаллал дахху-ласулул ттучаннал чIарах бацIаву дурсса бахшишру духлахисса конкурс дурунни. Гава кьини, Минводы шагьрулийсса «Джип-центрданул» буллусса, ччинийх буккайсса машинарттай хъамал Гъуниннал райондалийн аьрххилий лавгунни, гичча, «Гъази-Гъумучи» фондрал сиптачитурал оьвкуну, вай биянтIиссар Лакрал райондалийнгу. Вайннал ссапарданущал жущава кIул хьун бюхъантIиссар Инстаграмраву «неизвестныйдагестан» тIисса хэштегралу.

Залму АьбдурахIманова