Гьашину 80 шинал юбилей кIицI лаглай бур ДР-лул Культуралул министерствалучIасса Республикалул Халкьуннал творчествалул къатта. Юбилейрал лагрулий, апрельданул 23-нния байбивхьуну, майрал 1-ннийн бияннин, дуван тIий бур цаппарасса шадлугъру. Миннуясса ихтилат хьунни ДР-лул Культуралул министерствалул конференц-залдануву хьусса батIаврий.
БатIаву дачин дурну бия ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадова.
Юбилейрал хьунийнсса шадлугъирттавасса цалчинмурну хьунни Къумукьнал театрдануву апрельданул 23-нний тIиртIусса дунияллул халкьуннал дянивсса ХII «Играй, душа!» фестиваль. Муний халкьуннал музыкалул инструментру бищаврил гьунарду ккаккан бунни ва бувантIиссар республикалул районнаясса ва шагьрурдаясса, Аьрасатнал регионнаясса ва дазул кьатIатусса музыкантътурал.
Апрельданул 28-нний тIи­тIинтIиссар дунияллул халкьуннал дянивсса IV фестиваль «Каспий – берега дружбы». Мунивух гьуртту хьунтIиссар Аьрасатнал 13 региондалиясса ва 3 чил билаятраясса творчествалул коллективру. Фестивальданувух гьуртту хьунтIиссар бусравсса хъамалгу, масалдаран, щаллагу дунияллул къавтIаврил фестиваллал федерациялул Генсекретарь, Болгъарнавасса Емил Димитров, оьруснал халкьуннал костюмралсса буллалисса Сергей Глебушкин ва м.ц..
Фестивальданувух гьурттушинна дуван най ур жулла республикалиясса 600-нния ливчусса инсаннал ва республикалул дазул кьатIатусса 200-нния ливчусса инсаннал.
Фестивальданул лагрулий хьунтIиссар цикссагу батIавуртту ва шадлугъру, конференцияртту ва выставкарду, мастер-классру ва концертру.
Апрельданул 29-нний Дарбантлив Нарин-къалалий хьун­тIиссар пагьламантурал байран «Пагьламан», халкьуннал балайлул байран «Пой, ашуг!».
Апрельданул 30-нний Ма­хIачкъалалив дагьайсса поселокирттайгу ккаккан дувантIиссар концертру.
Апрельданул 30-нний Оьруснал театрдануву хьунтIиссар ва фестиваль лакьлакьисса «Россия – Родина моя» цIанилусса гала-концерт. Вай шадлугъирттайн ччинаща учIан бюхъантIиссар, уква.
Майрал 1-нний тIурча, Оьру­с­­нал театрданул хьхьичI кьатIув ккаккан дувантIиссар «Кавказ – единая семья» фестивальданул гала-концерт.
Марита Велихановнал був­­сунни вай давурттайнсса хIадуршиндараву хъунмасса кумаг Республикалул БакIчинал чулуха хъанай бушиву. КIицI лавгунни юбилейращал барча баврил махъру уттинин цачIанма бившиву «Юнесколул» чулуха, Аьрасатнал культуралул министр Владимир Мединскийл чулуха, ПаччахIлугърал Думалул чулуха.

Бадрижамал Аьлиева