Ккуллал ва Лакрал районнал цачIусса «Лакский» полициялул инспектортал, участкарттал вакилтал чIун-чIумуй хьунабакьай Ккуллал райондалул шяраваллал жяматирттащал, дуклаки оьрчIащал, жагьилтуращал.
Вай хьунабакьавурттай агьамми ихтилатру шай уттисса чIумал инсантал террористурал авара буллалисса иширттая мурахасну бикIан багьлагьишиврия. Махъва-махъ мукунсса иш хьунни Санкт — Петербургуллал метролуву. Мукунсса ишру жучIавагу къахьуншиврул, полициялул зузалт чIявуну хьунабакьай дуклаки оьрчIащал.
Ккуллал шяраваллил кIилчинмур школалул 10-11-ми классирттал дуклаки оьрчIащал ихтилат буван увкIун ия «Лакский» полициялул каялувчи Амиров Юсуп. Ванащал бувкIун бия Ккуллал шяраваллил участкалул вакил Чаринов Ширвани ва чIумувун къабивсса оьрчIал ялув авцIусса инспектор ХIусайханов Нариман. Вайннал гьарта-гьарзану бувсуна оьрчIахь терроризм цирив, му ци багьана хьуну хъанахъиссарив ва мунияту жула зунттал кIанттай цукун бурувччуну бикIан багьлагьиссарив. Полициялул зузалтрал жавабру дуллуна оьрчIал ва учительтурал буллусса суаллахьхьунгу.
ХIажимурад ХIусайнов
