Ххувшаврил байрандалул МахIачкъалаллал кучардайх нанисса «БивкIу бакъасса полкрал» кьюкьлуву бия Читтурдал шяравасса ХIасанов СалихIлул наслугу.
ХIасанов СалихIлул дяъвилул ххуллия ва гьашину ашкара хьусса мунал аьрали наградалия жу чивчуссия «Илчи» кказитрал 17-мур номерданий («Илчи» №17, 5 май 2017 ш. лаж. 12).
ДакIнийн бутан, СалихI талай ивкIссар Брянскаллал, Воронежуллал, Сталинградуллал ва цаймигу фронтирттай. Жан дуллуссар 1943 шинал Курскаллал дугалийсса къизгъинсса талатавриву.
Гьашину Аьрасатнал Обороналул министерствалул Центральный архиврал документирттава гъан-маччанан кIул хьунни Богатыревка тIисса шяравалличIасса талатавурттаву ккаккан дурсса къучагъшиврухлу СалихIлун «Къучагъшиврухлу» тIисса медаль дуллуну диркIшиву.
Ххувшаврил байрандалул кьини Сталинград буручлай бивкIсса цала буттал ниттил ниттил ва ниттил буттал суратирттащал бувккун бия майданнив Сафия ва Надия Кабиевахъул.
1942 шинал Сталинградрай разведкалул дивизиондалул командирну бивкIсса, мунияр махъ Румыниянавун, Чехословакиянавун бияннин дяъвилул ххуллу бивтсса Таисия ва прибордал отделениялул командирну ивкIсса ХIасан ХIасанов кIул хьуну бур дяъвилул цIараву. Дяъви къуртал хьуну махъ вайннал бувну бур кулпат ва бусса оьрмулий дурурччуну дур дяъвилул цIараву хьусса эшкьи-ччаву.
ХIадур бувссар
А. Аьбдуллаевал
