Майрал 20-нния 21-ннийнсса хьхьуну щалагу Аьрасатнаву хьунни «Музейрдал хьхьу» тIисса акция. Мунивух гьурттушинна дунни жулла республикалулгу. Ва хьхьуну Дагъусттаннал хьхьичIунсса музейрду зий бия уква ва чIал чIумалнин.
П. ХIамзатовал цIанийсса Изобразительный искусствардал музейрал ва акция дайдирхьунни Аьрасатнал цIа дурксса художник Николай Лаковлул выставкалия. Микку махъ лахълай, ДР-лул культуралул министр Зарема Буттаевал увкунни:
— ХIакьсса усттарнал выставкалийну дайдихьлай буру жува «Музейрдал хьхьу». Кьадарданун ччан бивкIун бур Николай Андреевич Лаков ларгсса ттуршукулул 20-ку шиннардий Дагъусттаннай уну. Мунал жунна ссайгъатран кьадиртун дур дагъусттанлувтурал-передовиктурал ххаллилсса суратру, пишкаш дурну дур жунна бусалардавун багьсса «Лезгинка» коллективрал яннардал ххаллилсса эскизру. Лахьхьу Миллатрал библиотекалийгу хьуссар «Художник Николай Лаков. От советского авангарда до соцреализма» тIисса луттирал презентация. Барчаллагь ва проектрал ялув захIмат бувсса цинявннанмагу.
Дагъусттаннал Миллатрал библиотекалий хьунни тамашачитурансса уквасса экскурсияртту, личIи-личIисса лекцияртту. Т. Мурадовлул цIанийсса Дагъусттаннал паччахIлугърал филармониялул артистътурал ва хьхьуну музейравун бавтIминнан хасну щаллу бунни Дагъусттаннал композитортурал цIанихсса произведенияртту.
Этнографиялул комплекс «Дагъусттаннал шяравалу» – музей-заповедникравугу хьунни ДГУ-лул культуралул факультетрал студентътал гьурттусса шадлугъру. Дагъусттаннал паччахIлугърал халкьуннал инструментирттал оркестрданул рурцунни язи-язими макьанну. Хьунни цIа дурксса шаэртуращалсса ва чичултращалсса хьунабакьавурттугу.
МахIачкъала шагьрулул тарихрал музейравун бавтIми ва хьхьуну кIул хьунни художник Лена Родинал давурттащал. Музыкалул номерду ккаккан бунни МахIачкъала шагьрулул Культуралул управлениялул ОьрчIал филармониялул.
Тамашачитуран хIаз дизансса программа хIадур дурну дия Дунияллул культурардал ва диннал тарихрал музейралгу (Дарбантливсса). Шивун бувкIми хьунабавкьунни художник Елена Джетерещал.

Бадрижамал Аьлиева