Оьрмулуву хьхьичIун ливчусса, лахъсса къуллугъирттайн лавхъсса инсантураву нажагьсса акъа къаикIай, цаламур оьрмулул ххуттава тинай ливчуну, обществалул, инсаннал масъаларттал ялув пикри буван шайсса ва цаманал буруккинтталсса буллан хIадурсса.
Цала харжлугърацIух элмулул, культуралул, искусствалул иширттаву чIарав бацIаву дуллансса хIакьсса меценатъталгу чIявусса бакъар. Жуннив тIайлабацIу хьунни мукунсса ца инсаннащал хьунабакьинсса – ва бур Илиясова Мариян ЧIибиевна.
Ва бур лакрал культуралул, му хьхьичIуннай даврил ялув мяйжаннугу буруккинттарайсса, миллатрал масъаларттал ялув дакI цIуцIисса инсан.
Мариян ЧIибиевна цалгу-кIилгу къавхьуссар хъамалу жул библиотекалий, ихIсаниятрал акциярдал лагрулийгу.
Уттигъаннугу бивунни жучIан Мариян ЧIибиевнаясса ссайгъат – лакку мазрайсса ххаллилсса луттирду – магьри, оьрчIансса назмурду ва хаварду, ниттил маз лахьхьинсса «самоучитель» ва мукунна цамургу литература. Вай луттирдал чIюлу бувантIиссар жул шагьрулул библиотекартту.
Хъунмасса ва дакIнийхтунусса барчаллагь тIий буру Мариян Илиясовахь, чIа тIий буру цIакьсса цIуллу-сагъшиву, буллугъшиву, цимур-цаннуву тIайлабацIу.
Таиса МахIаммадова,
Каспийскаллал ЦБС-рал
директор
