Библиотекарттал кьинилун хасну
Уттигъанну, ттула ца иширай, хъуншагьрулул дязаннийсса Николаевлул цIанийсса кучалийсса библиотекалувун бувххукун, гара кьурахъул шиннардил хьхьичI кьариртсса нахIусса, чувкIуй яла хьунакъадакьайсса луттирдал кьанкьгу, гара, зимизрал чIу баянуксса, пахъдагьругу гивура ляркъунни.
Университетрал библиотекалуву жунна аьркинсса дарсирал литература лякъин къабювхъуни, жу чара бакъа левчуну лагаймур библиотека вая. Шивун буххайхту, хханссия чIунгу, ссятгу дуний дарцIусса. Библиотекалувун бувхни, танива аьдат хьусса куццуй, щурщулий бакъа ихтилатгу бан дакI диллай дакъая. Мукунсса тIалавшинна дикIайссия библиотекардавун бувхни. ЦIанагу мукунна духьунссар.
ЧIярусса каруннавух буклакаврил бух хьусса, цIусса, хъунисса, мюрщисса луттирдал, жужрал, кказит-журналлал дурцIусса чIамурду, цирив ца аьжаивсса, ссигъарисса паракьатшиву, ва библиотекалул зузалал ва вила дянивсса щурщу. Укунсса тагьардануха лащай ттун библиотека. ЦIанамур никиран бюхъай на тIимур щалва къабувчIин. Аьйгу дакъар. ЦIана заманагу, халкьгу, чIумуха лавхьхьуну, библиотекардая цукссагу арх бувцун бур. Бунугу, хIакьину шивун заназиссагу чансса бакъар. ХIакьсса буккущагу луттирал, канил бувгьуну бакъа, муний чивчумунил тIин-тIааьнгу, мяъна-мурадгу интернетрава лаласун къабюхъайхьунссар.
Майрал 27-нний жула билаятрай кIицI лагайссар Библиотекардал кьини. Ци интернетрал, технологиялул замана бучIарчагу, библиотекардалмур бияла жула оьрмулуву ттигу-шилагу хъунмассар.
Николаевлул кучалийсса ЦБС-рал 2-мур библиотекагу ДГПУ-лул, ДГУ-лул общежитиялул студентътал, 37-мур ва 5-мур школардал дуклаки оьрчIру бучIайсса, ми аьркинсса луттирдал, литературалул щаллу байсса ца мурцIур. Бур мукунма шиккун бучIайсса муданмасса цала буккулт-оьрмулул бугьарамигу.
Зийгу бур шикку цала пишагу, цивппа зузисса кIанугу ххирасса, цала буржру марцIну биттур буллалисса зузалт. Цивппагу жула лакку душру.
Библиотекалул хъунмурну зий бур 1-мур ЦIувкIратусса Рамазанова Фарида Бакрил душ. Шикку ва 90-ку шиннардия шинмай зий бур. Буттал шяраву школагу къуртал бувну, Фарида дуклан бувххун бур Дагъусттаннал педагогикалул институтрал чил билаятирттал мазурдил факультетрайн. Мугу къуртал бувну, дакIний-мазрайвагу бакъа, библиотекардал аралуву зун бивкIун бур.
Шиву ялагу зий бур Кьубатусса Мусаева Сиясат ва Бархъаратусса ХIусманова Рисалат.
Жул кказитрайгу чIа-чIаннин рищайссар вайннал цала буккултран хIадур дурсса шадлугъирттаясса хъуни дакъасса макьалартту. Гьарца байраннан, хасъсса пишакартурал кьинирдан, личIи-личIисса шаэртурал, чичултрал юбилейрдан хасну дувайсса вайннал шадлугъирттай гьуртту шайссар чIаравсса школардал ва вузирдал оьрчIругу. Фаридал бусаврийну, библиотекалувусса луттирдал фонд дусса дур сайки 20 азаруннийн дирсса. Буккултращалмур даву дакъасса, шивусса зузалтрал даврил буссар ца цамургу, щинкIуй щуркIал къашайсса, кIану. Ми, гьар кьини учирчагу, буссар бух хьусса, ххябувксса луттирдан «дару-дарманну» буллай, хIакьсса хIакинтал кунма, гьарца луттирал ялув бавцIуну, буккултрал ва луттирдал дянив бавцIусса къаралчитал кунма.
Библиотекардал кьинилул байрандалущал цала даврил уртакьтал ва буккулт барча буллай, Фарида ва ванищал зузими чIа тIий бур цIуллушиву ва луттирду ккалансса гъира лекъащаву.
Жугу, жула чулуха шагьрурдайсса ва жула шаннагу райондалийсса библиотекарттал пишакартал ва кьинилущал барча буллай, чIа тIий буру тIайлабацIу ва вания гихунмайгу луттирдал, библиотекарттал, вайннал пишалул бусрав-сий лагь къашаву!
Залму АьбдурахIманова
